Qazaxıstanın neft hasilatı iyunda artaraq rekord səviyyəyə çatıb

Dünyanın ilk on neft istehsalçısından biri olan Qazaxıstanda neft hasilatı ötən ay artaraq mart ayında qeydə alınmış rekord səviyyəyə çatıb. Bu barədə məsələyə bələd olan mənbə Reuters agentliyinə məlumat verib.

İyunda, ABŞ-ın “Chevron” şirkətinin rəhbərlik etdiyi Tengi̇z yatağında hasilatın artması ilə Qazaxıstanın xam neft hasilatı əvvəlki aya nisbətən 7,5% artaraq gündəlik 1,88 milyon barelə çatıb. Bu göstərici ölkənin OPEC+ çərçivəsində iyun üçün müəyyən edilmiş 1,5 milyon barel kvotasını xeyli üstələyib.

Mənbənin sözlərinə görə, ümumilikdə xam neft və kondensat istehsalı iyunda 2,15 milyon barel/gün təşkil edib ki, bu da may ayındakı 2,02 milyon bareldən çoxdur.

Tengiz yatağında gündəlik hasilat iyunda 953 min barelə yüksəlib, may ayında bu göstərici 813,200 barel idi. "Chevron" yanvar ayında bu mürəkkəb və yüksək kükürdlü sahədə 48 milyard dollarlıq genişlənmə layihəsinə başlayıb.

Tengiz yatağının operatoru “Tengizchevroil” ticarət fəaliyyətinə dair şərh verməyib, Qazaxıstanın energetika nazirliyi isə Reuters-in sorğusuna cavab verməyib. Nazirlik daha əvvəl OPEC+ razılaşmasına sadiq qaldıqlarını, lakin milli maraqların prioritet olduğunu bəyan etmişdi.

OPEC+ qrupunun 8 üzvü – Səudiyyə Ərəbistanı, Rusiya, Küveyt, İraq, BƏƏ, Qazaxıstan, Oman və Əlcəzair – avqust ayı üçün hasilat siyasətini müəyyənləşdirmək məqsədilə iyulun 6-da görüşəcək.

Reuters-in əldə etdiyi məlumata görə, bu görüşdə OPEC+ tərəfindən gündəlik hasilatın 411 min barel artırılması qərara alına bilər.

İlin ilk yarısında Qazaxıstanın kondensatsız neft hasilatı ötən ilin eyni dövrü ilə müqayisədə 13% artaraq 1,79 milyon barel/gün səviyyəsinə yüksəlib.

Reuters-in dövlətə məxsus “KazMunayGaz” şirkətinin məlumatlarına əsaslanan hesablamalarına görə, Qazaxıstan bu il neft hasilatı üzrə əvvəlki proqnozlarını təxminən 2% üstələyə bilər.

N.Təbrizli