ARGTMŞ-ın növbəti məlumat turu “Azərkosmos” Açıq Səhmdar Cəmiyyətində

 Məlumat turu ARGTMŞ-ın üzvü olan gənclər təşkilatlarının rəhbər və fəallarının iştirakı ilə baş tutub.

Tur zamanı gənclərə Avropa, Afrika, Mərkəzi Asiya və Yaxın Şərqin 50-dən çox ölkəsinin cəmləşdiyi ortaq məkanda mühüm informasiya ötürücüsü funksiyasını yerinə yetirən Azərspace-1 peykinin buraxılmasına zərurət, müştəri xidmətlərinin təşkili və perspektiv planlar kimi mövzular haqqında ətraflı məlumat verilib. Məlumat turunda, həmçinin iştirakçılar peyk vasitəsilə teleradio yayımı, səs və videonun ötürülmə mexanizmi ilə tanış olublar. Daha sonra, məlumatların ötürülməsini təmin edən proqram və texnologiyaların real iş rejim prossesi haqqında məlumatlar verilib.

Məlumat üçün qeyd edək ki, ARGTMŞ gənclər təşkilatları arasında ölkənin tarixi, mədəniyyəti, incəsənəti, innovativ və müasir texnologiyalarının təbliği və onların məlumatlılığının artırılması məqsədilə mütəmadi olaraq məlumat turları həyata keçirir. Bugünədək ARGTMŞ-ın təşkilatçılığı ilə "Dövlət Bayrağı Meydanı Kompleks İdarəsi”, "Quba Soyqırım Memorial Kompleksi”, "Sağlam Ailə” klinikası, Azərbaycan Diplomatik Akademiyası (ADA), Xalça Muzeyi, Binəqədi rayon İcra Hakimiyyəti, Azərbaycan Respublikasının Milli Məclisi, 5 saylı Bakı "ASAN xidmət” mərkəzi, Nəqliyyatı İntelektual İdarəetmə Mərkəzində məlumat turları təşkil olunub.