Əflatun Amaşov: “Mənbəsiz xəbər yaymaqla populyarlıq qazanmaq istəyirlər”

Şura sədrinin sözlərinə görə, ötən il ön cəbhə ilə bağlı dezinformasiyaların yayılmasının əsas səbəblərindən biri xəbərlərə tez bir zamanda reaksiya verilməsi idi: "Çox təəssüflər ki, bəzi saytların həmin andakı vəzifəsi ajiotaj yaratmaq idi. Məsələnin ikinci mənfi tərəfi ondan ibarət idi ki, keçən il bizim xəbər agentlikləri erməni xəbər portallarının yaydıqları dezinformasiyaları götürüb xəbərə çevirir, cəmiyyətə ötürürdülər. Misal üçün filan kənd alındı, erməni hərbiçiləri cəbhədə toplanıblar və s.” 

Ə.Amaşov qeyd edib ki, bəzən jurnalistlər hərbiçi ölümü ilə bağlı xəbərləri digərindən daha tez dərc etmək istəyirlər: "Amma bununla bağlı əvvəlcədən müəyyən hazırlıqlar görülməlidir, informasiyanın ötürülməsində müəyyən tapşırıqlar verilməlidir ki, xəbər tam düzgün formada ictimaiyyətə çatdırılsın”.

Ə.Amaşov keçən ilki hadisələrdən sonra montorinq keçirərək yanlışlıqlara yol verdiklərinə görə sayt rəhbərlərinə xəbərdarlıq olunduğunu xatırladıb. 

Daha sonra o,  xəbər saytlarına hərbi informasiyaların hazırlanması zamanı Müdafiə Nazirliyinə istinad edilməsinin zəruriliyi haqqında tapşırıqların verildiyini qeyd edib: "Bundan sonra bir neçə bu tip toplantılar keçirdik və nəhayət, ölkə başçısı bu hadisə ilə bağlı sərəncam imzaladı”.

Şura sədri əlavə edib ki, parlament seçkilərində, manatın devalvasiyası, MTN-də baş verən olaylar zamanı, Rabitə və Yüksək Texnologiyalar Nazirliyində baş verən hadisələrdə bəzi informasiya saytları heç bir mənbəyə istinad etmədən özəl xəbər adı altında informasiyalar yayaraq populyarlıq qazanmaq istəyiblər. 

Ə.Amaşov "KİV haqqında” qanunun tələblərinə və "Jurnalistlərin Peşə Etikası” kodeksinə  əməl edilməsinin vacibliyindən danışıb: "Bu qanunlara əməl edilib xəbər yazılsa, mənbəyi məlum olmayan xəbərlər ictimaiyyətə verilib, çaşqınlıq yaradılmaz”.

Tədbirdə qeyd  olunub ki, gələcəkdə jurnalistika fakültələrində hərbi kafedraların yaradılması barədə təkliflərə baxılacaq.

Qeyd edək ki, "Ekstremal situasiyalarda işləyən jurnalistlərin psixoloji və təcrübə” layihəsinə noyabr ayının 5-də start verilib.