Qəlbi qırıq balacaların birgünlük sevinci - FOTOLAR

ANN.Az xəbər verir ki, Təhsil Nazirliyin təşkilatçılığı ilə 4 nömrəli Respublika Xüsusi İnternat Məktəbində Dünya Azərbaycanlılarının Həmrəyliyi Günü və Yeni il münasibətilə tədbir keçirilib. Tədbirə nazirliyin əməkdaşları, eləc də bir çox KİV nümayəndəsi qatılıb. 

İnternat məktəbinin direktoru Vəfa Seyidova belə bir tədbirin təşkil edilməsi üçün Təhsil Nazirliyinə təşəkkürünü bildirib: "Bayramlarda, xüsusi günlərdə uşaqları yaddan çıxarmamaları bizim üçün böyük sevincdir”. 

İnternat məktəbinin şagirdləri də qonaqlara öz töhfəsini verib. Onlar hazırladıqları məşhur "Turp" səhnəciyini ifa ediblər və bu, hamıda maraq oyadıb.

Daha sonra şagirdlərin hər birinə hədiyyələr təqdim olunub.

Media nümayəndələri internat məktəbində şagirdlər üçün yaradılan tədris və məişət şəraiti ilə yaxından tanış olub, şagirdlərlə birgə nahar ediblər. KİV təmsilçilərinə məlumat verilib ki, Sağlamlıq imkanları məhdud, valideyn himayəsindən məhrum olmuş uşaqlar üçün 4 nömrəli Respublika Xüsusi İnternat Məktəbi 2015-ci ildə Heydər Əliyev fondu tərəfindən əsaslı təmir və tikinti işləri başa çatdırıldıqdan sonra cari ilin noyabrında şagirdlərin istifadəsinə verilib.

Qeyd edək ki, internat məktəbində 198 nəfər sağlamlıq imkanları məhdud uşaq təlim-tərbiyə alır. Onlardan 104 nəfər sağlamlıq imkanları məhdud uşaq isə internat məktəbinin nəzdində fəaliyyət göstərən reabilitasiya mərkəzinə cəlb edilib. Şagirdlərin təlim-tərbiyəsi ilə 103 nəfər pedaqoji heyət məşğul olur.