Valideynlər övladlarını ən çox bu məktəblərə qoymaq istəyirlər

Bu barədə Modern.az-ın sorğusuna cavab olaraq Bakı Şəhəri üzrə Təhsil İdarəsindən məlumat verilib. Qeyd edilib ki, martın 1-dən bu günə qədər 8693 nəfər valideyn məktəb, lisey və gimnaziyalara sorğu yerləşdirib.

Hazırkı məlumata əsasən, 4811 nəfər oğlan, 4355 nəfər qız I sinfə qəbul üçün elektron sistemdə qeydiyyatdan keçirilib.

I sinifə qəbulla bağlı Xəzər rayonu üzrə 26, 149, Nizami rayonu üzrə 145, 210, Suraxanı rayonu üzrə 87, 270, 281, Binəqədi 83, 179, 182, 205, 284, 299,  Nərimanov rayonu üzrə 47, MLK, Yasamal rayonu üzrə 60, 167, Nəsimi rayonu üzrə 54, 211, 240, Xətai rayonu üzrə 17, 245, Qaradağ rayonu üzrə 139 nömrəli məktəblərə I sinfə şagird qəbulu ilə bağlı tələbat çoxdur.   I sinfə elektron qeydiyyat başlayan tarixdən etibarən qeydiyyatdan keçmə prosesi və texniki məsələlərlə bağlı Bakı Şəhəri üzrə Təhsil İdarəsinə və bu məsələ ilə bağlı yaradılmış komissiyalara müraciətlər olub.  

Qeyd edək ki, təhsil nazirinin 19 fevral 2016-cı il tarixli, 108 nömrəli əmrinə əsasən, 2016-2017-ci dərs ili üçün I sinfə şagird qəbulunun elektron sistem vasitəsi ilə həyata keçirilməsi prosesinə 1 mart 2016-cı il tarixdən başlanılıb.