Rasim Əliyevin ölüm işi: Hökm martın 17-ə qaldı - YENİLƏNİB

ANN.Az-ın məhkəmə zalında olan əməkdaşının verdiyi məlumata görə, məhkəmə sədri son söz olaraq jurnalist Rasim Əliyevin anası Teyfurə Əliyevaya söz verib.

Teyfurə Əliyeva çıxışında bildirib ki, Rasim hər zaman öz yerini bilən, davranışlarına sahib olmağı bacaran şəxs olub: "O iş yerində də yaxşı işlədiyinə, sayılıb seçildiyinə görə rəhbər təyin edilib. Onun özü də idmançı olub. Boksla məşğul idi, özünü cəmiyyətdə necə aparmalı olduğunu da yaxşı bilirdi. İdmançı olmaq kimsəyə əsas vermir ki, nəsə artıq hərəkət eləsin”.

Teyfurə Əliyeva əlavə edib ki, futbolçu Cavid Hüseynovun əxlaqsız hərəkətini hamı görüb: "Rasim də bir jurnalist kimi öz fikrini bildirib ki, bu cür insanın bizim ölkəni xaricdə təmsil eləməsini istəmir. Ayağın yaxşı işləməsi və iki top vurmaq nə əxlaqdan, nə də tərbiyədən xəbər verir”.
 
Mərhumun anasının sözlərinə görə, video görüntülərdə də Rasimin necə döyüldüyü açıq-aşkar təsvir olunur: "Bu görüntülərə baxmaq üçün nə hüquqşünas olmaq lazımdır, nə də psixoloq. Təqsirləndirlənlərin vəkilləri ancaq günahı həkimlərin üstünə, ya da başqa yerə çəkirlər. Səbəb nədir? Onlar Rasimi döyməsəydilər, oğlum xəstəxanaya düşməyəcəkdi axı. Ancaq demirəm ki, həkimlər də günahsızdır, yox. Burada həm  həkimlər həm də təqsirləndirilənlər günahkardır və buna görə də hamı öz cəzasını almalıdır”.

Zərərçəkən şəxsin hüquqi varisi sonda bir daha bu işin planlı şəkildə Cavid Hüseynovun və Elşən İsmayılov törətdiklərini vurğulayıb: "Bu Cavidin və Elşənin planlaşdırdığı bir iş idi. Ancaq buna görə nə özləri, nə də valideynləri günah hissi daşımaq istəmirlər. Düşünmürlər ki, bir insanın həyatına son qoyulub. Peşmançılıq hiss belə keçirmirlər. Buna misal kimi keçən dəfə Elşənin "Yaxşı etmişəm öldürmüşəm” deməsi bir daha sübut edir ki, bu iş planlaşdırılmış şəkildə həyata keçirilib”.

 

Daha sonra söz vəkillərə verilib. Təqsirləndirilən şəxslərin vəkilləri hakimdən hökm çıxarılarkən yüngülləşdirici halların nəzərə alınmasını xahiş ediblər. Onlar eyni zamanda bütün proses zamanı müdafiə tərəfin qaldırdığı vəsatətlərin qəbul edilmədiyini, məhkəmənin ədalətsiz keçirildiyini qeyd ediblər.

 

Sonda hakim təqsirləndirilən şəxslərə söz verib. Amma onlar son söz deməyə hazır olmadıqlarını, vaxt verilməsini xahiş ediblər. Təqsirləndirilən Elşən ismayılov bu məhkəmə prosesində 5 nəfərin taleyinin həll olunduğunu bildirib: "Xahiş edirik bizə vaxt verin ki, son söz deməyə hazırlaşaq. Bir gün bizim üçün yetərli deyil, çıxışlarımızı özümüz hazırlayırıq".

Məhkəmə martın 17-i, saat 14.00-a qədər təxirə salınıb. Hakim həmin gün təqsirləndirilən şəxslərin son söz deyəcəyini, eyni zamanda məhkəmə qərarının çıxarılacağını deyib.