“Elmlər Akademiyası”nın əsas girişi bağlanır

"Bakı Metropoliteni” Qapalı Səhmdar Cəmiyyəti metronun "Elmlər Akademiyası” stansiyasının birinci vestibülü aprelin 15-dən sərnişinlərin giriş-çıxışı üçün bağlanacaq.

Bu barədə Oxu.Az-a "Bakı Metropoliteni”nin Mətbuat xidmətinin rəhbəri Nəsimi Paşayev bildirib.

O qeyd edib ki, sabahdan etibarən vestibüldə təmir işlərinə başlanacaq:

"Elmlər Akademiyası” stansiyasının birinci vestibülündə quraşdırılmış 3 ədəd eskalator istismar müddətini başa vurduğu üçün müvafiq qaydada dəyişdirilməlidir.

Buna görə də həmin vestibüldəki hər 3 eskalator söküləcək və yeni, müasir eskalatorlarla əvəzlənəcək. Eskalatorla yanaşı, stansiyanın birinci vestibülü də təmir ediləcək. Təmir işlərinin təxminən 6 ay çəkəcəyi gözlənilir".

N.Paşayev bildirib ki, təmir müddətində sərnişinlər stansiyanın ikinci vestibülündən, yəni ikinci çıxışından giriş-çıxış kimi istifadə edəcəklər.
www.ann.az