Sinifdən xaric qiraət kitabxanası “edu.ann.az”-ın təqdimatları davam edir

 Layihə çərçivəsində həyata keçirilən təqdimatlarda 200 nəfərə yaxın müəllim və şagird sözü gelən elektron kitabxana barəsində məlumatlandırılıb.

Layihənin məqsədi şagirdlərin ədəbiyyat dərslərində verilən sinifdən xaric qiraət vasitələri ilə təmin olunması və onların asudə vaxtlarının səmərəli keçirilməsinin təşkil olunmasıdır. "edu.ann.az” saytı vasitəsi ilə 5-11-ci sinif şagirdləri onlara tapşırılan əlavə ədəbiyyat materiallarını kitabxanaya getmədən, qısa bir zamanda əldə edə biləcəklər.

Sözü gedən təqdimatlar Sabunçu rayonu 72 saylı tam orta məktəbdə, Xəzər rayon 136 saylı tam orta məktəbdə, Nizami rayon 220 saylı məktəb-liseydə keçirilib. Təqdimatların iştirakçıları "edu.ann.az” saytı barəsində məlumatlandırılıb, müəllimlərin təklifləri dinlənilib və məktəblilərin sualları cavablandırılıb.

Xatırladaq ki, Azərbaycan Respublikası Təhsil Nazirliyi və Bakı Şəhər Təhsil İdarəsinin dəstəyi ilə ANN.az xəbər portalının hazırladığı "edu.ann.az” elektron kitab portalının təqdimatına 8 aprel 2016-cı il tarixində başlanılmışdır.

Qeyd edək ki, "edu.ann.az” layihəsi çərçivəsində həyata keçirilən tədbirlər Bakı şəhərinin 23-ə yaxın ümumtəhsil məktəbində baş tutub.