"Dağ yəhudiləri" dini icmasının keçmiş sədri evinə basqınla bağlı məhkəmədə ifadə verib

 

APA-nın məlumatına görə, prosesdə zərərçəkmiş şəxs qismində "Dağ yəhudiləri" dini icmasının sədri olmuş Boris Simanduyev ifadə verib. O bildirib ki, təqsirləndirilən şəxslərin üzlərində maska olub: "Başıma, sifətimə yumruqla vurdular. Pulların yerini soruşdular. Liza qışqırmaq istəyəndə onu bıçaqla vurdular. Əl-ayağımızı bağladılar. Pulları, qızılları götürdülər. O pulların çox hissəsi xaricdə yaşayan övladlarıma məxsus idi”.

 

 

Təqsirləndirilən şəxslərdən Eldar Avadyayev isə ifadəsində dağ yəhudisi olduğunu deyib. Bildirib ki, uzun müddətdir Qubada "Dağ Yəhudiləri” Dini İcmasının rəhbəri olan Boris Simanduyev müxtəlif ölkələrin dağ yəhudilərinin sinaqoqa etdikləri maddi yardımları mənimsəyir: "Ona görə də qərara gəldim ki, pulları Borisin əlindən alım”.

 

İttihama görə, Eldar Avadyayev 2014-cü ilin 6 dekabr tarixində "Dağ yahudi"ləri dini icmasının sədri Quba rayonu, Qırmızı qəsəbə sakini Boris Simanduyevin külli miqdarda əmlakını ələ keçirmək məqsədi ilə Xalid Seyidov, Coşqun Əliyev ilə əlbir olublar.

 

Onlar balta və bıçaqla silahlanaraq tanınmamaları üçün maska taxıb, həmin gün səhər saat 07 radələrində Xalid Seyidovun "İnfiniti" markalı avtomobili ilə Boris Sumanduyevin evinin qarşısına gəliblər.

 

Onlar evə daxil olaraq ev sahibini və bacısı Liza Simanduyevanı döyərək xəsarət yetiriblər. L.Simanduyeva basqınçılara müqavimət göstərərkən Coşqun Əliyev onu bıçaqlayıb. Bundan sonra özləri ilə gətirdikləri skotçla hər iki şəxsin əllərini və ağızlarını bağlayıb evi axtarmağa başlayıblar. E.Avadyayev Qırmızı qəsəbədə yerləşən Sinaqoqda 20 min manat pul olduğunu öyrəndikdən sonra oranın açarlarını Borisdən alaraq Sinaqoqa gedib. Amma bir neçə dəfə cəhd etməsinə baxmayaraq oranın qapısını aça bilməyib. Eldar Sinaqoqdakı pulu götürə bilməyib təkrar evə qayıdıb. Eldar evin mətbəxindəki seyfin qapısını balta ilə sındıraraq içərisindəki 395 min ABŞ dollarlı, 91 600 manat və 28 min rublu və müxtəlif sayda qızıl-zinət əşyalarını götürüb.