Məktəbdə dini təbliğat: Özbaşınalıq, yoxsa diqqətsizlik

Paytaxtın Binəqədi rayonu Biləcəri qəsəbəsində yerləşən Emin Əliyev adına 297 saylı məktəbdə Zərdüştlük dinini təbliğ edən, "Asif Ata” ocağı kimi tanınan təşkilatın nəşr etdiyi qəzet şagirdlərə paylanıb.

Mətbuata açıqlama verən məktəb direktoru Nailə Cəfərovanın sözlərinə görə, ayın 6-da ona bir təşkilat məktəbdə vətənpərvərlik ruhunda tədbir keçirməklə bağlı müraciət edib. O da bu təklifin şagirdlərin faydasına olduğunu düşünürək qəbul edib. Direktor həmçinin hadisədən xəbər tutan kimi dərhal qəzetləri şagirdlərdən topladığını da bildirib.

Bəs, görəsən, məktəbələrdə bu cür dini təbliğatın aparılmasına icazə varmı? Buna kim nəzarət etməlidir?

Kamran Əsədov - təhsil eksperti

Məsələ ilə əlaqədar ANN.Az-a açıqlama verən təhsil üzrə ekspert Kamran Əsədov təhsil müəssisələrində belə halların baş verməsinin qanuna zidd olduğunu deyir: "Yəqin ki, məktəb direktoru həmin təşkilatla müəyyən razılaşma edib, heç qəzetlə də maraqlanmayıb. Sonradan da məlum olub ki, bu qəzet dini təbliğ edirmiş. Direktor özünə haqq qazandırmaq üçün onsuz da deyəcək ki, bildiyim an qəzetləri yığışdırmışam. Necə ola bilər ki, məktəbə hansısa qəzet gətirilib paylanır direktorun ondan xəbəri olmur? Yaxşı, direktorun xəbəri olmayıb, bəs onun müavinləri, həmkarlar ittifaqının rəhbəri hara baxırdı?”

"Ümumiyyətlə, məktəbdə dini təbliğ edən hansısa mətbu nəşr paylanıla bilməz. Məktəbə hər hansı bir nəşr paylanılanda bunun nəzarət qaydası belədir: Məktəb direktoru Təhsil Nazirliyinə müraciət edir ki, təhsil müəssisəsində belə bir təşkilat mətbu nəşr paylamaq istəyir. Əgər razılıq olarsa, o başqa məsələ. Bu problemli məsələyə ilk növbədə təhsil nazirliyi cavab verməlidir”, – deyə K.Əsədov əlavə edib.

Problemli məsələyə rəsmi münasibət öyrənmək üçün Bakı şəhər Təhsil idarəsinə sorğu göndərsək də, suallarımızı cavablandıran olmadı.

 
Orxan Aslanlı