Rasim Əliyevin işi: "Digər həbs olunanlar azadlığa buraxılsa, təəccüblənmərəm"

Dünən Bakı Apellyasiya Məhkəməsində ANN.TV-nin əməkdaşı Rasim Əliyevin öldürülməsi işi üzrə həbs edilən "Qəbələ” klubunun sabiq kapitanı Cavid Hüseynov azadlığa buraxılıb.

Səbail Rayon Məhkəməsinin hökmü ilə 4 il müddətinə azadlıqdan məhrum edilən futbolçu Cavid Hüseynovun cəzası dünən məhkəmə qərarı ilə 1 il 3 aya endirilib və həbsdən azad olunub. Futbolçunun azadlığa buraxılmasını ANN.Az-a vəkil Fariz Namazlı və Əsabəli Mustafayev şərh ediblər.

Vəkil Əsabəli Mustafayevin sözlərinə görə, futbolçu ilə bağlı məhkəmənin yekun qərarı gözlənilirdi: "Məndə olan məlumata əsasən, onlar bir müddət əvvəl kassasiya şikayətini geri götürüblər. Təcrübədən də bilinir ki, kassasiya şikayəti hansısa bir məqsədə görə ya verilir, ya da geri götürülür. Bu məsələyə baxılsaydı, 2-3 ay çəkməli idi. Yəni vaxt uzanacaqdı, bu da onlara sərf etmirdi. Görünür şikayətin geri qaytarılması danışılmış bir tədbir idi. Belə olduğuna görə də onu tez-tələsik azad etdilər. Məhkəmənin qəbul etdiyi qərar, yəni cəzanın 1 il 3 aya endirilməsi sanksiyada göstərilən ildən də lap aşağı idi. Düzdür, bu məhkəmənin səlahiyyətinə aid bir məsələdir. Yəni qanunvercilikdə belə bir imkan var. Sadəcə məhkəmənin belə şəkildə təşkil edilməsi, işin tapşırılmış olduğunu bir daha sübut etdi. Bunun özü də ən böyük qanun pozuntusudur. İkinci isə cəza müddətinin sanksiyadan aşağı verilməsi əsaslandırılmalıdır. Əgər hansısa yeni faktlar çıxıbsa, nələr dəyişilibsə, hamısı bilinməlidir. Necə ki, futbolçuya 4 il cəza veriləndə hansı faktlar var idisə, o indi də mövcuddur. Heç bir məqam gizli saxlanılmamaldır. Niyə sanksiyadan aşağı cəza verilib, deyilməlidir. Bir sözlə sadalanan hallar hüquq pozuntularıdır”, - deyə Ə.Mustafayev əlavə edib.

Vəkil Əsabəli Mustafayev

Məsələyə münasibət bildirən zərərçəkmiş ailənin (mərhum jurnalist Rasim Əliyevin ailəsinin) vəkili Fariz Namazlı futbolçu Cavid Hüseynovun kassasiya şikayətinin geri götürməsindən sonra bu qərarın verilməsinin gözlənilən olduğunu dedi: "Bir çox faktlar, eləcə də, məhkəmənin tez bir zamanda apellyasiya baxışına təyin olunması onu göstərirdi ki, hadisələr futbolçunun azadlığa buraxılmasına doğru cərəyan edir”. 

Vəkil Fariz Namazlı

"Azərbaycan hökuməti beynəlxalq aləmə göstərirdi ki, jurnalist ölümünə görə futbolçunu belə cəzalandırdıq. Bir müddətdən sonra da həbsdən azad etdilər. Bax, reallıq budur. Bu cinayət faktına görə həbs edilən digər beş nəfərin hamısı yox, bir-ikisi bu gündən sonra azadlığa buraxılsa, təəccüblənmərəm”, - deyə vəkil bildirib.

Orxan Aslanlı