Bakıda məktəbin divarı uçdu

Ekologiya və Təbii Sərvətlər Nazirliyi (ETSN) Milli Geoloji Kəşfiyyat Xidmətinin geoloji planlama ekspedisiyasının dəstə rəisi Rafiq Həsənov APA-ya deyib ki, son günlər yağan yağışların nəticəsində 48 saylı orta məktəbin ərzisində idman meydançasının kənarında 25 metr uzunluğunda, 4 metr hündürlüyündə istinad divarı uçub. Onun sözlərinə görə, torpaq yuyulub, istinad divarı dayanıqlığın itirib, nəticədə uçqun baş verib.

R. Həsənov qeyd edib ki, uçqun 5 hektar ərazini əhatə edib: "İstinad divarının uçması nəticəsində torpaq 2 metrə qədər irəli gəlib”.

48 saylı orta məktəbin direktoru Şahismayıl Rüstəmov lent.az-a bildirib ki, torpaq uçqunu məktəb binasına hər hansı ziyan vurmayıb. O qeyd edib ki, uçqun məktəb binasından xeyli aralıda baş verib və stadionun kənarında bir neçə metrlik ərazini əhatə edib: "Hadisə gecə saatlarında baş verib. Yağışın təsiri ilə torpaq uçqunu olub, hər hansı xəsarət və ya maddi ziyan yoxdur".