Arıqlamağın faydaları: 5 XƏSTƏLİKdən qorunacaqsınız!

Artıq çəkidən azad olmaqla siz özünüzü bir çox ciddi xəstəliklərdən qoruya bilərsiniz.

 

Aile.lent.az saglamolun.az-a istinadən həmin xəstəlikləri sadalayır.

 

- Ürək-damar sistemi xəstəlikləri

Artıq çəkisi olan insanlarda normal çəkisi olan insanlarla müqayisədə ürək-damar sistemi xəstəliklərinin riski 3-4 dəfə çoxdur. Belə insanlarda ürək böyük gərginliyə məruz qalır və bu, ürəyin daha tez yaşlanmasına, ürəkdə müxtəlif pozulmaların əmələ gəlməsinə səbəb olur.

Bu səbəbdən artıq çəkidən azad olmaqla bu xəstəliklərin riskini xeyli azaltmaq mümkündür. Nəzərə almaq lazımdır ki, bütün dünyada ürək-damar sistemi xəstəlikləri ölümün əsas səbəbi sayılır.

 

- Şəkərli diabet

Statistika göstərir ki, 2-ci tip şəkərli diabeti olan insanların 90%-də artıq çəki var. Piylənmə zamanı karbohidratların mübadiləsi pozulur, hüceyrələrin insulinə qarşı həssaslığı azalır. Bunlar isə şəkərli diabetin inkişafına təkan verir.

Şəkərli diabetin əsas profilaktik tədbiri bədən çəkisini normada saxlamaqdır.

Şəkərli diabet xəstəliyi olan insanlarda çəkinin azalması vəziyyətini xeyli yaxşılaşdırır.

 

- Qaraciyərin piylənməsi (hepatoz)

 

Artıq çəkisi olan insanlarda piy qaraciyərdə yığılmağa başlayır. Nəticədə orqanın fəaliyyəti pozulur, ağır, geriyədönməz pozulmalar inkişaf edir (sirrozun inkişafına qədər).

Arıqlamaqla siz özünüzü ağır qaraciyər xəstəliklərindən qoruya bilərsiniz.

 

- Oynaq xəstəlikləri

Artıq çəkisi olan insanlarda oynaqlar (söhbət bütün oynaqlardan və o cümlədən onurğa sütünundan gedir) həddindən artıq yüklənir və bu da oynaqlarda pozulmaların inkişafına gətirib çıxardır.

 

- Menstrual dövrün pozulması və sonsuzluq

Piy toxuması qadın hormonlarını ifraz etmək qabiliyyətinə malikdir. Qadın orqanizmində cinsi hormonların balansının pozulması (onların artıqlığı və ya əskikliyi) menstrual dövrün pozulmasına, ovulyasiya ilə olan problemlərə və nəticədə sonsuzluğa səbəb ola bilər.

Məhz bu səbəbdən həkimlər sonsuzluqdan əziyyət çəkən artıq çəkisi olan qadınlara bədən çəkisini normallaşdırmağı tövsiyə edirlər.