Sakinlərin yolu bağlaması ilə bağlı icra hakimiyyətindən AÇIQLAMA

 

Bakı Şəhər Baş Dövlət Yol Polisi İdarəsinin İctimaiyyətlə əlaqələr şöbəsinin rəisi, polis polkovniki Vaqif Əsədovun Modern.az-a verdiyi məlumata görə, yağış sularının fəsadlarının aradan qaldırılması üçün yol polisi əməkdaşları da əraziyə cəlb edilib.

 

Məsələ ilə bağlı Binəqədi Rayon İcra Hakimiyyətinin mətbuat xidmətindən Modern.az-ın sorğusuna cavab olaraq verilən cavabda rayonda baş verən problem təsdiqlənib:

 

"Son günlər Bakı şəhərində iqlim normasından artıq intensiv yağan yağışlar nəticəsində rayonumuzun bir sıra yaşayış məntəqələrində subasma halları baş verib, sakinlərin normal həyat şəraiti pozulub”.

 

Qeyd edilib ki, güclü yağış sularının törətdiyi fəsadların aradan qaldırılması məqsədilə Rayon İcra Hakimiyyəti Başçısı yanında Müşavirə keçirilib:

 

"Fövqəladə Hallar Komissiyasına ciddi tapşırıqlar verilib. Komissiyanın sədri – Rayon İcra Hakimiyyəti başçısının birinci müavini İlqar Süleymanovun rəhbərliyi ilə rayonun aidiyəti qurumları – Rayon Sukanal İdarəsi, Rayon Polis İdarəsi, Rayon Fövqəladə Hallar və Mülki Müdafiə Şöbəsi, Yanğınsöndürmə İdarəsi, Rayon Mənzil-Kommunal Təsərrüfatı Birliyi, Rayon İcra Hakimiyyəti başçısının inzibati və sahə inzibati ərazi dairəsi üzrə nümayəndəlikləri, bələdiyyələr və digər qurumlar tərəfindən əraziyə xüsusi texnikalar cəlb edilərək dərhal təcili təxirəsalınmaz tədbirlər görülüb”.

 

Bildirilib ki, sakinlərin 1646 SMX-nə müraciətinə daha çevik reaksiya verilməsi məqsədilə rayonun hər bir qəsəbəsi üzrə Fövqəladə Hallar Komissiyasının Alt Qərargahları yaradılıb:

 

"Hazırda yağış suları ilə dolmuş ərazilərdə, xüsusilə də Xocəsən, Biləcəri, Rəsulzadə və Binəqədi qəsəbələrində bu istiqamətdə işlər davam etdirilir”.

 

Qeyd edək ki, bu gün Binəqədi sakinləri rayondakı vəziyyətlə bağlı etiraz aksiyası keçirib, yolu bağlayıblar. Əraziyə polis əməkdaşları cəlb olunub.