Xaricdə təhsil proqramının dayandırılımasına görə nələri itiririk?

 

Məsələ ilə bağlı Modern.az-a danışan təhsil eksperti Etibar Əliyev bildirib ki, 2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramının ölkədə insan kapitalının inkişafında əhəmiyyəti çox böyük olub.

 

"Bu gün hətta Avropa ölkələri belə öz vətəndaşlarını xarici ölkələrdə təhsil almaq üçün göndərirlər. Yəni ölkələrin ali məktəbləri bütün ixtisaslar üzrə sanballı mütəxəssislər hazırlamaq gücündə olmurlar. Bu məsələ bizim üçün də aktual olduğundan xeyli sayda qabiliyyətli gənclərimiz dünyanın aparıcı universitetlərinin ali məktəblərinə göndərildi. Ölkəyə qayıdıb gələnlər fərqli bilik, bacarıq  və tədqiqatlara malik olan vətəndaşlarımızdır. Onlar həm də sağlam təhsil və elm mühitinin yaranmasına töhfələr verirlər”.

 

Ekspertin sözlərinə görə, Azərbaycan ali məktəbləri 2005-ci ildən Boloniya Bəyannaməsinə qoşulub.

 

"Lakin etiraf etmək lazımdır ki, bu sənədin əsas şərtlərindən biri olan tələbə mobilliyi prosesi zəif həyata keçirilir. Dövlət proqramı ilə Azərbaycan gənclərinin xarici ölkələrdə təhsil almaları həm də bu problemi həll etmiş olurdu.

 

Fikrimcə əvvəlki illərə nisbətən az sayda da olsa bakalvr pilləsində təhsil almaq üçün gənclərimiz ölkə üçün faydalı olan ixtisaslar üzrə dünyanın aparıcı universitetlərinə göndərilməlidirlər. Fasiləsizliyin pozulması elm və təhsil sahəsində uğurlarımızı ləngidə bilər. Elmin və təhsilin qabaqlayıcı funksiyası ölkələrin inkişafının əsas şərlərindən biridir. Bunu həm də qeyri-neft sektoruna artan diqqət də diktə edir”.