Deputatların 90 faizində xidməti silah yoxdur

 

Məsələ ilə bağlı keçmiş deputat, hüquqşünas, Əliməmməd Nuriyev Modern.az-a danışıb. Əliməmməd Nuriyev bildirib ki, silah haqqında qanuna görə deputatların silah gəzdirmək hüququ var.

 

"Mənim düşüncəmə görə, deputat yalnız o hallarda silah gəzdirmək üçün icazə almalıdır ki, hansısa real təhlükələr var. Azərbaycanda  bunun üçün bir zəmin görmürəm. Ən azından deputatın həyatına ciddi bir təhlükə yoxdur. Eyni zamanda Azərbaycanın hüquq mühafizə orqanları elə bir şərait yaradıblar ki, deputatın və digər şəxslərin həyatına təhlükə yaradacaq şəxslər yoxdur. Əlbəttə ki, ölkəmizdə də cinayətkarlar var. Cinayətkarlar hamıya  münasibətdə eyni davranış göstərə bilərlər. Ancaq vətəndaşların mülkiyyəti və həyatını ehtimal olunan mümkün qəsdlərdən ehtiyatlı  surətdə hüquq-mühafizə orqanları tərəfindən qorunur. Ümumilikdə Azərbaycan cəmiyyətinin həyatı üçün təhlükə yoxdur”.

 

Hüquqşünasın sözlərinə görə, deputatların silah gəzdirmə hüquqları xarici ölkələrin təcrübəsində də var. 

 

"Mənim bildiyim qədəri ilə hal-hazırda deputatlarımızın 90 faizdən çoxu hər hansı silahla bağlı müraciət etməyib və silah gəzdirmir. Məşhur bir deyim var:

 

"Divardan asılan tüfəng bir gün açıla bilər”. Ona görə də ən yaxşısı silahdan istaifadə etməməkdir. Deputatın silah alıb özünü bu üsullarla qoruması doğru deyil. Bu gün ölkəmizdə hər hansı bir şəxsin təhlükəsizliyi etibarlı şəkildə qorunur. Nəinki fərqli olaraq hərəkətlər etmək, hansısa bir vasitələrdən istifadə etmək.

 

Mən özüm də 5 il müddətində deputat olmuşam. Bu qanun mənim deputat olduğum dönəmdən qüvvədədir. Ancaq mən bunun üçün Daxili İşlər Nazirliyinə müraciət etmədim və bilirəm ki, həmkarlarımın əksəriyyəti də müraciət etmədi. Silahların verilməsi Daxili İşlər Nazirliyi tərəfindən həyata keçirilir”.