Bakıda Şimali Kipr Türk Cümhuriyyətinin təşkilatçılığı ilə tədbir keçirildi

Noyabrın 30-da Bakıda Şimali Kipr Türk Cümhuriyyətinin Mədəniyyət və Turizm nazirliyinin təşkilatçılığı ilə tədbir keçirilib. 

ANN.Az xəbər verir ki, "Hilton" otelində baş tutan tədbirdə millət vəkilləri, ictimaiyyət nümayəndələri iştirak ediblər.

Tədbirdə çıxış edən Şimali Kipr Türk Cümhuriyyətinin Azərbaycandakı nümayəndəsi Ufuk Turganer toplantının 2 ölkə arasındakı münasibətləri gücləndirəcəyinə ümid etdiyini dedi.

Şimali Kiprin Mədəniyyət və Turizm naziri Fikri Ataoğlu azərbaycanlıları bu ölkəyə səfər etməyə dəvət etdi: 

"Şimali Kipr Türk Cümhuriyyətində yaşayanlar sizin qardaşlarınızdır. Onlar sizinlə eyni dini, dili, mədəniyyəti paylaşır. Türkiyəyə vizasız gedə bildiyiniz kimi, Şimali Kiprə də vizasız gedə bilərsiz.  Biz hamımız qardaşıq. Şimali Kiprdəkilərin Azərbaycana, Azərbaycandakıların Şimali Kiprə gedib-gəlmələrini daha rahat təmin etməliyik. Azərbaycan da Şimali Kiprlilərin rahatlıqla gələ biləcəyi yerdir".

Millət vəkili Qənirə Paşayeva Şimali Kiprə qarşı Avropa ölkələrinin ədalətsizlik etdiyini vurğuladı: 

"Hamımız Şimali Kiprə qarşı Avropa ölkələrinin ədalətsizlik etdiyinin şahid oluruq. Biz də buna inad olaraq universitet seçərkən, səyahət üçün ölkə seçərkən, tibbi turizmdən yararlanmaq istərkən bu ölkəni seçmək lazımdır. Həmçinin Şimali Kiprdən olan iş adamlarını Azərbaycana dəvət edirəm".

 

Tədbirin sonunda tanıtım çarxı nümayiş olundu.