Jurnalistin işdən çıxarılması ətrafında QALMAQAL

23.01.2017 22:01

Artıq bir neçə gündür ki, Lider TV-nin Rusiya müxbiri Anar Həsənovun yanvarın 17-də Rusiya xarici işlər naziri Sergey Lavrova verdiyi sual və həmin suala görə işdən çıxarılması məsələsi müzakirə olunur.

Jurnalisitn " Azərbaycan işğal altında olan ərazisində antiterror əməliyyatı apararsa, Moskva buna göz yumar, yoxsa Azərbaycanın daxili işinə müdaxilə edər", sualına cənab Lavrovun "Dağlıq Qarabağ münaqişəsi artıq Azərbaycanın müstəsna daxili işi deyil ", - deyə cavab verməsi cəmiyyətdə ciddi narahatlıq doğurub.

Verilən məlumata görə, jurnalistin Rusiyada fəaliyyətinin dayandırılması barədə təşəbbüs bilavasitə Azərbaycanın Rusiyadakı səfiri Polad Bülbüloğludan daxil olub. O, hesab edib ki, jurnalistin sualı və Lavrovun ona cavabı "iki ölkə arasındakı dostluq münasibətlərinə zərbə vurub".

"Atlas" Siyasi tədqiqatlar mərkəzinin rəhbəri Elxan Şahinoğlunun fikrincə, bu suala cavab Rusiyanın Qarabağ üzrə əsl siyasi xəttini açıb göstərdi.

Elxan Şahinoğlu

"Səhv verilən sual olmur, yanlış cavablar olur. Öz sualı ilə jurnalist Lavrovu Dağlıq Qarabağ münaqişəsinin həlli ilə bağlı nə düşündüyünü səsləndirməyə məcbur edib. Əslində bu suala görə, Anar Həsənova təşəkkür etmək lazım idi. Bəyəm, jurnalist o sualı verməsə idi, Lavrov Qarabağla bağlı ayrı mövqe tutacaq idimi? Aydındır ki, bağlı toplantılar zamanı Lavrov, məhz belə mövqe nümayiş etdirir. Sadəcə, indi biz də bunu eşitdik. Bununla Lavrov ermənilərin tərəfdarı olduğunu ortaya qoydu. Bu hadisə ona gətirib çıxaracaq ki, başqa telekanalların müxbirləri sual verərkən ehtiyat edəcək və xarici ölkələrin rəsmilərinə prinsipial suallar verməyəcəklər".

Azərbaycan parlamentinin üzvü, politoloq Rasim Müsabəyov isə jurnalistin sualını "əyalət səviyyəli" kimi qiymətləndirdi.

Rasim Müsabəyov

"O hansı cavabı gözləyirdi? Düşünürdü ki, Rusiya deyəcək ki, get Dağlıq Qarabağda nə istəyirsən et? Rusiyanın mövqeyini bilmək istəyirdiz, buyurun, bu da Rusiyanın mövqeyi. Belə axmaq sual vermək lazım deyildi. Məncə, bu əyalət səviyyəli sual idi. Əlbəttə jurnalistlər sual verməkdə azaddılar. Amma telekanal rəhbərləri də jurnalistlərini istənilən vaxt qeyri peşəkarlığa görə işdən çıxarmaq hüququna malikdir", - deyə Rasim Musabəyov ANN.Az-a söylədi.

Lider kanalının xəbərlər departamentinin rəhbəri Anar Şükürov isə Modern.az saytına bildirib ki, müxbirin işdən çıxarılması ilə verdiyi sual arasında heç bir əlaqə yoxdur.

"Təəssüf ki, Anar Həsənovun işdən çıxarılması indiyə təsadüf etdi. Yəni, onun işdən cıxarılması ilə Rusiya xarici işlər nazirinə verdiyi sual arasında heç bir əlaqə yoxdur. Onun işdən çıxarılmasının başqa səbəbi var. Bütün müəssisələrdə işçilərin işdən çıxarılması hadisələri baş verir. Müqavilələrin vaxtları bitir və ya işçilər öz istəyi ilə işdən gedirlər. Məsələn, 2 ay, 5 gün qabaq başqa işçilər işdən azad edilib", - deyə Anar Şükürov bildirib.

Azadlıq radiosuna müsahibəsində Anar Həsənov bildirib ki, onu işdən çıxarıblar: " Bəli, mən Lider telekanalının müxbiri deyiləm və bundan artıq bir şey deyə bilmərəm".

Lavrovun müsahibəsindən altı gün sonra Abşeron rayon Pirküşkül qəsəbəsindəki hərbi şəhərcikdə çıxış edən Azərbaycan prezidenti İlham Əliyev bildirib ki, "Dağlıq Qarabağa heç vaxt müstəqillik verilməyəcək"...