Macarıstanda təhsil üçün sənəd qəbulu elan olunub

Təhsil Nazirliyindən verilən məlumata görə, Təqaüd proqramı Təhsil Nazirliyi və Macarıstan İnsan Resursları Nazirliyi arasında 2014-cü il noyabrın 11-də imzalanmış İş Proqramına əsasən həyata keçirilir. 

Proqram Azərbaycan vətəndaşlarına müəyyən olunmuş ixtisaslar üzrə təqaüd hesabına təhsil almaq imkanı yaradır. Macar dilində ali təhsilə başlamazdan öncə tələbələr Balassi İnstitutunda birillik hazırlıq kursu keçməlidirlər. İngilis dilində proqramlar üçün müraciət edən tələbələr ev sahibi təhsil müəssisəsi tərəfindən müəyyən olunmuş səviyyəyə (keçid vasitəsilə tanış ola bilərsiniz) müvafiq ingilis dili biliyinə malik olmalıdırlar. 

Proqram çərçivəsində Macarıstan tərəfindən hər il 200 Azərbaycan vətəndaşı üçün təqaüd ayrılacağı nəzərdə tutulub.