Niyə Azərbaycanda “All inclusive” təklif edilmir?

anews.az xəbər verir ki, Fins.az Azərbaycanda yerləşən mehmanxanalarda bu xidmətin olub-olmadığını araşdırıb. Məlum olub ki, belə bir xidmət yoxdur. Baxmayaraq ki, ölkədəki hotellər kifayət qədər turist qəbul edir.

Hotellər və Restoranlar Assosasiyasının rəhbəri Samir Dübəndinin sözlərinə görə, bu cür xidmət daha çox resort tipli məkanlarda mövcuddur.

Azərbaycanda bu cür yerlərin "barmaq sayı” qədər olduğunu deyən S.Dübəndi "all inclusive” xidmətinin yerli hotellərimizə xeyir vermədiyini bildirib.

Ekspertin sözlərinə görə, Türkiyədə çimərlik mövsümü mart ayından başlayıb oktyabra yaxın bitdiyi halda, bizdə mövsüm elə də uzun olmur. Elə bu səbəbdən də bu cür xidmətlərin mehmanxanalara daha çox ziyan verə biləcəyi bildirilir.

S.Dübəndinin fikrincə, çimərlikləri yetərincə inkişaf etdirmək lazımdır: "Bunu üçün dəniz sahili və dəniz dibi də işlənməlidir ki, burada yetərincə istirahət mərkəzləri salınsın. Türkiyə bu yolu artıq 15-20 il bundan qabaq başlayıb və çoxdan bu cür çətinlikləri geridə qoyub”.