Bəzi məktəblərə muxtariyyət veriləcək

Trend-in məlumatına görə, bunu Təhsil Nazirliyinin Təhsilin inkişafı proqramları şöbəsinin müdiri Emin Əmrullayev deyib.

Onun sözlərinə görə, kurikulum sistemi ilə bağlı hazırlanan yeni standartlara edilən əsas dəyişiklikdə öz keyfiyyətləri ilə seçilən, təmayüllü məktəblərə müəyyən çərçivələrdə fənlərlə, məzmunla bağlı muxtariyyətin verilməsi məsələsi yer alacaq: "Hazırki kurikulum sistemi buna imkan vermir. İlkin mərhələdə bu çox az sayda məktəblərə şamil olunacaq. Bu məktəbləri Təhsil Nazirliyi seçəcək. Məktəblər öz fənlərini müəyyən etməkdə daha çox muxtariyyət əldə edəcəklər".

Şöbə müdiri əlavə edib ki, yeni standartlar hazırsa ictimai müzakirəyə təqdim olunub: "Yeni standartlarda müəyyən fərqliliklər var. Belə ki,standartlara dəyərlər də əlavə olunub. Məsuliyyətlilik, çalışqanlığı tədrisin bir hissəsi kimi görürük. İlk vaxtlar kurikulum sistemində mövzu əsas rol oynayırdı. 2008-ci ildən isə bu günə qədərə bilik və bacarığa əsaslanan kurikulum sistemi idi. Xeyirxahlıq, vətənpərvərlik, sevginin aşılanması yeni əlavə olunan dəyərlərdə öz əksini tapıb".

O qeyd edib ki, sənədin müzakirələri zamanı təkliflər gözlənilir, bundan sonra sənəd təsdiq üçün hökumətə göndəriləcək. Bizim təhsili məzmunu ilə bağlı ümumi anlayışlar təkmilləşməlidir. Yeni kurikulum təhsildə deqredasiyaya səbəb olmayıb. Kurikulum həmişə təkmilləşən, zamanın tələbinə cavab verən sənəd olmalıdır.