Sürücülər müraciət hazırladı: Biz həmişə günahkarıq?

Bu barədə Axar.az-a açıqlama verən hüquqşünas, yol-nəqliyyat eksperti Ərşad Hüseynov bildirib ki, fəal sürücülər yollarda baş verən piyada vurulması hadisələrinə münasibətdə uzun müddət formalaşmış yanlış stereotiplərin dəyişdirilməsinə yönələn təşəbbüs irəli sürmüşdü. Bu məqsədlə sürücülər qəza hadisələrini araşdıran və hüquqi qiymət verən Ali Məhkəmə, DİN, Baş Prokurorluq orqanlarına müraciət hazırlayıb:

"Bu müraciət belə hadisələrin ədalətlə, obyektiv araşdırılmasına, cəmiyyətimizdə, əksər hallarda həm də istintaq və məhkəmə təcrübəsində formalaşan "həmişə sürücü günahkardır" düşüncəsinin aradan qaldırilmasına çağırışdır. Bilirik ki, hadisələrin əksəriyyətində sürücülər günahkardır, amma şübhəsiz ki, hamısında yox. Lakin həmin yanlış stereotip bəzən piyada intizamsızlığına rəvac verir, günahsız sürücü isə məhkuma çevrilir. Hər ikisi cəmiyyət üçün itkidir. Bunu dəyişmək lazımdır”.

Ötən ilin statistikasını xatırladan hüquqşünas bildirib ki, rəqəmlər də ürəkaçan deyil:

"2016-ci ildə ölkəmizdə qeydə alınmış piyada vurulma hadisələrinin 93 faizində sürücülər, cəmi 7 faizində isə piyadlar təqsirli sayılıb. Yol hərəkəti təhlükəsizliyinin və yol hərəkəti mədəniyyətinin səviyyəsi ölkəmizə yaxın, yol hərəkəti iştirakçılarının hüquqi məsuliyyəti məsələsini tənzimləyən qanunvericiliyi isə bizim qanunvericiliklə, demək olar ki, eyni olan Rusiya Federasiyasında isə 2015-2017-cı illərdə qeydə alınmış piyada vurulma hadisələrinin təxminən 54 faizində sürücülər, 42 faizində piyadlar, 4 faizində isə başqa şəxslər (xüsusən yol-nəqliyyat infrastrukturuna görə məsul şəxslər) təqsirli olub. Məsuliyyətli sürücünü piyadanın etdiyi səhvə görə cəzalandırılmaması üçün hər kəs bu müraciətdə qoşulmalıdır”.

Qeyd edək ki, fəal sürücülərin başlatdığı müraciət bu gün - 2 mart tarixində 18:30-dan 20:30-a dək Gənclik Mall AVN-in 3-cü mərtəbəsində baş tutacaq.