Bank rəhbərinə qarşı cinayət işi başlandı

Hakim Azər Paşayevin sədrlik etdiyi iclasda şahid qismində lisenziyası ləğv edilən "Zaminbank"ın ASC-nin Müşahidə Şurasının sədri Nadir İsmayılov ifadə verib. O bildirib ki, Rövşən Heybətov bank vasitəsilə Türkiyəyə pul köçürmək istəyib. Rövşənin bizə 200 min manat borcu vardı: "Dedi ki, evimi satıb, pulu verəcəm. Amma razılaşmadıq. Mən bu barədə Elton Məmmədova da məlumat verdim. Rövşən xaricdə olanda Elton Məmmədova söz verdim ki, onu tapıb, sizin pulu ödəməsinə kömək edəcəm". 

Sonra prokuror vəsatətlə çıxış edərək bildirib ki, istintaqı aparan müstəntiq tərəfindən xaricə pul köçürməsi ilə bağlı "Zaminbank"ın Müşahidə Şurasının sədri Nadir İsmayılova qarşı cinayət işi başlanıb: "Buna görə xahiş edirəm ki, prokurorluğa bu işin nəticəsi ilə bağlı sorğu verilsin. Görək, cinayət işi ayrılandan sonra bunun nəticəsi nə olub?"

Məhkəmə vəsatəti təmin edib və istintaq orqanına N. İsmayılova qarşı açılmış cinayət işinin nəticəsi ilə bağlı sorğu göndəriləcək.

Proses aprelin 13-də davam etdiriləcək.

Qeyd edək ki, idman ustası, K-1 döyüş növü üzrə məşqçi Rövşən Heybətov sabiq deputat Elton Məmmədovun oğlu Elnur Məmmədovun şikayəti əsasında həbs edilib.

Elnur Məmmədov Bakı şəhər Baş Polis İdarəsinə müraciət edərək, Rövşən Heybətovun onun etibarından sui-istifadə edərək ona qarşı 200 min manat miqdarında dələduzluq əməli törətdiyini bildirib.

Faktla bağlı araşdırma aparılıb, Rövşən Heybətov saxlanılıb. Onun barəsində ötən il noyabrın 25-də Xətai rayon Məhkəməsinin qərarı ilə 2 aylıq həbs-qətimkan tədbiri seçilib. Sonradan onun barəsində ev dustaqlığı ilə bağlı qətimkan tədbiri seçilib.

Ona Cinayət Məcəlləsinin 178.3.2 (külli miqdarda dələduzluq) maddəsi ilə ittiham verilib.

Elnur Məmmədov "Best of the Best” promoşn qrupunun prezidenti, həmçinin, K-1 döyüş üzrə beynəlxalq qurumun Azərbaycan və Yaxın Şərq üzrə rəsmi nümayəndəsidir.

 

//APA