Bu şəxslərin kreditləri silinsin – Millət vəkilindən təklif

Axar.az xəbər verir ki, deputat Ə.Mənsimlinin Milli Məclisin 24 aprel tarixli iclasındakı çıxışında etdiyi təklifin mətbuatda verilən hissəsi qısaldıldığı üçün anlaşılmayıb.

Millət vəkili bununla bağlı bildirib ki, təklif mətbuatda gedən hissədən xeyli fərqlidir:

"Devalvasiyaya qədər borcunu rahatca ödəyən, amma devalvasiya nəticəsində borcunu əvvəlki qaydada ödəyə bilməyən şəxslərə güzəştlər tətbiq edilməsini təklif etmişəm. Məsələn, 5 min, imkan varsa, 10 min dollara qədər olan kreditlər 1,05 manat kursu ilə qaytarılsın. Daha iri məbləğli borclar üçün isə 1,2-1,3 manat kursu və ya başqa variant götürmək olar. Bu prosesin reallaşmasında heç kimə ağırlıq düşməsin deyə, risklərin banklar, əhali və dövlət arasında bölüşdürülməsi variantından istifadə edilsin. Burada söhbət imkanı olub, qəsdən borclarını ödəməyən varlılardan getmir”.

Millət vəkili bildirib ki, araşdırma aparılaraq, borcunu ödəmək iqtidarında olmayan bütün imkansız şəxslərin borcları silinsin:

"Xüsusi prezident fərmanı ilə vətənimizin ərazi bütövlüyü uğrunda həlak olmuş hərbi qulluqçuların ailəsinə 11 min manat pul veriləcək. Bu, təqribən 6,5 min dollar edir. Elə olmasın ki, həmin şəhid ailələri alacaqları pulları kredit borclarına sərf etsinlər. Ona görə də təklif edirik ki, məsələn, heç olmasa, 3 min dollara qədər olan borclar, eləcə də 150-170 manat və s. pensiya alanların borcları bağlansın. Araşdırma aparılaraq, borcunu ödəmək iqtidarında olmayan bütün imkansız şəxslərin borcları silinsin. Bundan ötrü fiziki şəxslərin müflisləşməsi haqqında qanun qəbul edilsin və buna əsasən şəhid ailələrı, kimsəsizlər, aşağı pensiya alan pensiyaçılar, krediti qaytarmaq üçün bütün imkanları tükənmiş aztəminatlı insanların aldıqları kreditlər isə məhkəmə yolu ilə müflisləşmə mexanizmi vasitəsilə bağışlansın"