Meyxana qadağası yaşayan Kərimin son durumu

Bu sözləri Kult.az-a açıqlamasında meyxanaçı Ağamirzə Məmmədov dostu, tanınmış meyxana ustadı Ağakərimin səhhəti ilə bağlı danışarkən deyib. O bildirib ki, həkim həmkarı Ağakərimə (Kərim Novruzov) meyxana ilə məşğul olmağı qadağan edib:

"Təxminən il yarım bundan əvvəl Kərim insult keçimişdi. Həmin vaxtı vəziyyəti çox ağır idi. Nə danışa, nə də yeriyə bilirdi. O xəstəxanada yatan vaxtı anası rəhmətə getdi. Bir az yaxşılaşandan sonra anasının öldüyünü öyrəndi. İstər-istəməz bu da Kərimə zərbə oldu. Əvvəllər lap pis idi. İndi vəziyyəti xeyli yaxşılaşıb, özünü idarə edə bilir. Buna baxmayaraq, həkimi sənətlə məşğul olmağa, həm də gəzməyə icazə vermir. Hərdənbir həyətə düşüb gəzir. İndi ona çox yorulmaq olmaz.

Axırıncı dəfə iki gün əvvəl görməyə getmişdim. Aydın Xırdalanlı, Mehman Əhmədli, Rəşad Dağlı, Pərviz Bülbülə, Yaşar Qafarlı və digər sənət dostları tez-tez ustada baş çəkirlər. Maştağa uşaqlarının əksəriyyəti Kərimi ziyarət edir”.

Ağakərim Novruzovun bacısı oğlu Rüstəm bəy isə saytımıza açıqlamasında meyxanaçının tezliklə efirə çıxacağını deyib:

"Bir həftəyə evlərində çəkiliş olacaq. İnşallah, tamaşaçılar Ağakərim bəyi efirdə görə biləcəklər”.