Bakı-Sumqayıt yolunda təmir taksiləri bahalaşdırdı

Axar.az xəbər verir ki, artıq 3 gündür davam edən təmir səbəbilə yolda yaranan sıxlığa görə Bakı-Sumqayıt yolu üzrə taksi xidməti göstərənlər qiyməti bir neçə dəfə qaldırıblar. Normal günlərdə 1-2 manat arasında dəyişən qiymətlər təmirə görə 3-5 manata qədər qaldırılıb.

Bakıdan Sumqayıta və əksinə gedən sakinlərin sözlərinə görə, günün pik saatlarında taksi sürücüləri qiyməti hətta 5 dəfəyə qədər qaldırırlar. 1 və ya 2 manata başa gələn yolu günün pik saatlarında sürücülər 8 manata aparır.

Sərnişinlər bildirib ki, artıq 3 gündür ki, vəziyyət belədir. Taxsi sürücülərinin süni qiymət artımına sakinlər etirazlarını bildirsə də, heç bir dəyişiklik yoxdur.

Yeri gəlmişkən bildirək ki, sözügedən yolda təmir səbəbilə yaranmış böyük sıxlıq və taksi sürücülərinin özbaşınalığı Bakı-Sumqayıt-Bakı qatarından istifadə edənlərin sayını artırıb.

Rəsmi məlumata görə, adi günlərdə Bakı-Sumqayıt-Bakı qatarı ilə 5 min sərnişin daşınırdısa, təmir günlərində sərnişin sayı 10 min 836 nəfərə çatıb.

Xatırladaq ki, hazırda Bakı-Sumqayıt yolunda təmir işləri aparılır. 26 iyun tarixindən başlayan işlər təxminən 20 gün davam edəcək.