İşıq problemi və sui-qəsd olayı: Nə baş verir?

AzVision.az mövzu ilə bağlı Milli Məclisin deputatlarından münasibət öyrənib.

Millət vəkili Aydın Mirzəzadə bildirib ki, iyulun 3-ü gecədən baş verən hadisə insanlar arasında çaşqınlıq, panika yaratmadı. Onun sözlərinə görə, vətəndaşlar vaxtında informasiya aldılar, çətinliyin müvəqqəti olduğunu başa düşdülər.

"İki gündür hər birimiz elektrik enerjisinin kəsilməsi ilə bağlı yaşanan problemlərin iştirakçısıyıq. İndiyə qədər görülən işlər bizi bu sınaqdan uğurla çıxardı. Dövlət öz üzərinə düşən vəzifəni yerinə yetirə bildi, qısa zamanda problem aradan qaldırıldı, xaricdən elektrik enerjisi cəlb edildi və insanların kommunal problem yaşamasının qarşısı alındı. Metrodan insanların evuakasiyası itkisiz həyata keçirildi və Bakı Nəqliyyat Agentliyi insanları ödənişsiz daşıdı. Bu günə qədər görülən işlər dövlətin iki gündə yaşanan problemlərə hazır olduğunu göstərdi, həmçinin cəmiyyətimiz də hazır oldu. Metroda təxliyyə olunan insanlara kənardakılar maksimum qayğı göstərməyə çalışırdı, polis işçiləri özlərini çox yüksək səviyyədə göstərdi. Xidmət sahələri öz vəzifəsinin öhdəsindən gəldi”.

A.Mirzəzadə bildirib ki, gözlənilməz hadisə hər an ola bilər, əsas buna hazır olmaqdır. "Biz bununla hazır olduğumuzu göstərdik. Kənardan heç bir dəstək olmadan problemin qarşısı alındı və dərinləşməsinə imkan verilmədi. Iyulun 3-də baş verən hadisə bu sahəyə daha çox vəsait ayrılmasının, yenilənmənin həcminin artmasının vacib olduğunu göstərdi. Energetika sahəsi böyük vəsait tələb edən sahədir, özəlləşdirilməyə çıxarılması hələ tezdir. Bunu daima yüksək səviyyədə saxlayacaq, vəsait qoyacaq sənaye qrupları hələ yoxdur. Ona görə bu vəzifəni dövlət yerinə yetirilməli olur. Energetika sahəsinin yenilənməsi, yeni avadanlıqların alınması, təmir tələb edən sahələrdə təcili işlərə başlanılması ilə bağlı müvafiq addımlar atılır”. 

Deputat vurğulayıb ki, Gəncənin icra başçısına qarşı sui-qəsd gözlənilməz və təəssüfedicidir: "Bunun harada və necə baş verməsi barədə hərtərəfli tədqiqlər aparılacaq və məlumat veriləcək. Elmar Vəliyev Azərbaycanın fədakar və çalışqan regional rəhbərlərindəndir. O və onun mühafizəçisi sağdır, müalicələri davam edir. Bu gün onun qardaşına zəng etdim və vəziyyətinin yaxşı olduğunu və heç bir problemin olmadığını bildirdi”.

Millət vəkili Nizami Cəfərovun fikrincə, istər elektrik enerjisinin kəsintisi, istərsə də cinayət hadisəsi dünyanın hər bir yerində ola bilər, heç kim bundan sığortalanmayıb.

"Vəziyyət tam nəzarətdədir, insanlara bununla bağlı məlumatlar verilir. Narahat olmağa, qeyri-adi nəticələr çıxartmağa ehtiyac yoxdur. Qurumlar öz işini görür, vəziyyət, proseslər cənab Prezidentin nəzarəti altındadır. Qısa zamanda təhlükə aradan qaldırılıb”.