Razi Nurullayevdən Gəncə olayı ilə bağlı - Çağırış

Axar.az xəbər verir ki, bu sözləri Azərbaycan Xalq Cəbhəsi Partiyasının sədri Razi Nurullayev qeyd edib. O, xalqı dövlətin yanında olmağa çağırıb:

"Bu xəbər məni üzdü və dövlətə qarşı bu tip üsyanı qəbul etmədiyimi bəyan edirəm. Heç bir ölkədə hökumət təmsilçilərinə qarşı silahlı müqavimət müsbət dəyişikliyə gətirib çıxarmayıb. Əksinə, ölkələri daha bərbad günə qoymaqla bərabər, onminlərlə günahsız insanın ölümünə səbəb olub.

Xalqımızı təmkinli olmağa, qanunsuz hərəkətlərdən çəkinməyə çağırıram. Dünyanın bütün ölkələrində dövlət, hökumət təmsilçisinə zor tətbiq etmək, öldürmək bağışlanılmaz günahdır və pozuntudur. Siyasi və digər müstəvilərdə aparılan mübarizələr dinc olmalıdır. Dövlətə qarşı üsyan etmək yolverilməzdir. Hökumətlər gəlir və gedir, amma dövlət qalır. Biz dövlətimizin yıxılmasına göz yuma və seyrçi qala bilmərik. Dövlətimizi qoruyaq və imkan verməyək ki, xarici düşmən qüvvələr ölkəmizi məhvə sürükləsin”.

Qeyd edək ki, ötən gün saat 20 radələrində dini yönümlü bir qrup radikal şəxsin Gəncə şəhər İcra Hakimiyyətinin inzibati binasının önündə qeyri-qanuni aksiyanın qarşısını alan və öz xidməti vəzifəsini icra edən iki polis zabiti – Gəncə Şəhər Baş Polis İdarəsinin rəis müavini, polis polkovniki İlqar Balakişiyev və Nizami Rayon Polis İdarəsinin rəis müavini, polis polkovnik-leytenantı Səməd Abbasov radikalların hücumu nəticəsində qətlə yetiriliblər.