Polis oğlu sərxoş qonşusunu döyüb reanimasiyalıq etdi - Azərbaycanda

Toyda yeyib içmiş 27 yaşlı gənc ayılan kimi rəsmi ərizə ilə rayon polis şöbəsinə müraciət edib
Xaçmaza toya gedən Quba sakini elə toydaca bərk döyülüb və xəstəxanalıq olub.
İstiPress-in şimal bürosunun məlumatına görə, hadisə Xaçmaz şəhərindəki "Ariz" şadlıq sarayında keçirilən toy məclislərindən birində baş verib.
Quba rayonunun Adur kənd sakini, 27 yaşlı Elvin Fazil oğlu Abdrahmanov iştirak etdiyi toyda Xaçmazda yaşayan həmkəndlilərindən biri tərəfindən möhkəm döyülüb və Xaçmaz rayon mərkəzi xəstəxanasının travmatologiya şöbəsinə yerləşdirilib.
Xəstəxanadan aldığımız məlumata görə, Elvin Abdrahmanov şöbəyə qapalı kəllə-beyin travması, baş-beyin silkələnməsi, sağ göz yuvasının sıyrılmış yaraları və sol gözün qançırı dioqnozları ilə, sərxoş vəziyyətdə gətirilib və ona dərhal tibbi yardım edilib.
Zərərçəkənin ailəsi artıq rəsmi ərizə ilə Xaçmaz polis şöbəsinə müraciət edib. Əldə etdiyimiz məlumata görə, Elvin Abdrahmanovu şil-küt edən əslən Adur kəndindən olan, hazırda Xaçmaz şəhərində yaşayan keçmiş polis işçisinin oğludur. Rayon polis şöbəsinin istintaq bölməsində cinayət işi açılıb. Hələlik döyülmə faktına görə saxlanılan yoxdur.




www.anews.az