“Yaradan şərabı boşuna haram saymayıb ki...” - Millət vəkili

Millət vəkili Fazil Mustafa BDU-nun dünən işdən çıxarılan rektoru Abel Məhərrəmov və səfir oğlu ətrafında baş verən şərab qalmaqalına sətiraltı münasibət bildirib.

Anews.az BakuPost-a istinadən xəbər verir ki, o, yaradanın şərabı boşuna haram saymadığını deyib: "Hər dəfə xarici səfərdən qayıdanda gömrük işçilərinin diqqətini yük baqajımda çox sayda kitabın olması çəkir. Yaxınlaşıb hörmətlə soruşurlar ki, Fazil müəllim, bu qədər kitabı hər dəfə əziyyətlə xaricdən necə daşıyırsınız? Day bundan sonra kimsə belə bir sual verməz. Məsləhətlisi əziyyətlə də olsa kitab daşımaqdır. Uca Yaradan boşuna şərabı haram saymayıb ki... İlk ayəsi də boşuna "Oxu!" olmayıb ki...”

Xatırladaq ki, dünən prezident İlham Əliyevin sərəncamı ilə Abel Məhərrəmov Bakı Dövlət Universitetinin rektoru vəzifəsindən azad edilib. Buna səbəb kimi isə mətbuatda onun İspaniyada səfir olan oğlu Anar Məhərrəmovla gizli və qanunsuz yollarla şərab biznesi ilə məşğul olduğu barədə məlumat dərc edilib.