Evdə it-pişik saxlayan şəxs xəstələnəndə nə etməlidir?

İt, pişik və digər ev heyvanları Qida Təhlükəsizliyi Agentliyinin regional bölməsində uçota alınacaq. 

Medicina.az-ın məlumatına görə, bu, Nazirlər Kabinetinin "Azərbaycan Respublikasının yaşayış məntəqələrində it, pişik və ya digər ev heyvanlarının saxlanması Qaydaları”na etdiyi dəyişikliklərdə əksini tapıb. 

Bu dəyişiklik Qida Təhlükəsizliyi Agentliyinin yaradılması ilə əlaqədar baytarlıq sahəsində nəzarətin Kənd Təsərrüfatı Nazirliyindən alınaraq  Qida Təhlükəsizliyi Agentliyinə verilməsi ilə əlaqədar edilib. 

Beləliklə, şəxslərə məxsus ev heyvanlarının yoluxucu xəstəliklərə qarşı peyvəndlənmələrini, diaqnostik müayinələrini, digər baytarlıq-sanitariya tədbirlərini təşkil etmək məqsədi ilə onların Qida Təhlükəsizliyi Agentliyinin regional bölməsində uçota alınmaları (identifikasiya olunması) insanların sağlamlığı və ərazinin epizootoloji sabitliyinin qorunması baxımından yerinə yetirilməsi vacib olan mühüm dövlət baytarlıq tədbiridir.

Ev heyvanlarının xarici ölkəyə aparılması da artıq Kənd Təsərrüfatı Nazirliyi yanında Dövlət Baytarlıq Xidmətinin deyil, Qida Təhlükəsizliyi Agentliyinin regional bölməsinin baytarlıq şəhadətnaməsinin (sertifikatının) və müvafiq pasportun tərtib olunması ilə həyata keçiriləcək.  Ev heyvanı saxlayan və ya ona baxan hər bir şəxs heyvanlar xəstələndikdə, insanları, heyvanları dişləmə və zədələmə halları müşahidə edildikdə, onlara baxmaq və karantində saxlamaq üçün məhz Qida Təhlükəsizliyi Agentliyinin regional bölməsinə müraciət etməlidir. Ancaq indiyə qədər olduğu kimi bundan sonra da Dövlət Baytarlıq Xidmətində qeydiyyatda olan baytarlıq klinikalarında, itçilik klubunda öz heyvanlarını ildə bir dəfə müayinədən keçirməlidir. Baytarlıq idarələri hüquqi və fiziki şəxslərə məxsus heyvanlarda (it, pişik və s.) təlimata uyğun olaraq peyvəndləmələri, diaqnostik müayinələri, digər baytarlıq-sanitariya tədbirlərini və insan həyatı üçün təhlükəli xəstəlikləri olan itlərin, digər heyvanların məhv edilməsində baytarlıq xidmətini təşkil edir, heyvanların saxlanması qaydalarını pozan şəxslər haqqında müraciət daxil olduqda, qanunvericiliyə əsasən müvafiq tədbirlər görür və sahibsiz heyvanların ovlanmasında müvafiq tədbirlərin görülməsini təmin edir.