Səlcuq oğuzlarını Azərbaycana kim dəvət etdi? — FAKTLAR

Azərbaycan tarix kitablarında, xüsusilə də akademik əsərlərdə Səlcuq oğuzlarının Azərbaycana gəlişi istila kimi qiymətləndirilir. Halbuki, oğuzları Azərbaycana Rəvvadilər dəvət ediblər.

 "Ölkə.Az”a bu barədə maraqlı faktları tarixçi-alim Əkbər Nəcəf verib.

Dövrün mənbələrinə görə, Oğuzları Azərbaycana Rəvvadi Vəhsudan dəvət etmişdi. Vəhsudan bölgənin tamamına nəzarət etmək üçün oğuzlardan hərbi məqsədlə istifadə etmək niyətində idi. Rəvvadi Vəhsudan dəvət etdiyi oğuzları yaxşı qarşılayıb onlarla hərbi ittifaq yaratdı və gələn oğuz bəylərilə qohumlu əlaqələri təsis etdi. Bu məqsədlə Azərbaycana gələn oğuz bəyləri bölgənin müsləman əmirlərinə qız verməklə qalın başlık (başlıq pulu) adlanan ənənəyə əsaslanaraq böyük torpaq sahələri aldılar. Bu da onlara sonrakı mərhələdə bölgənin hüquqi sahibi olduqlarını iddia etməyə əsas verdi.

Ancaq Vəhsudan oğuz hərbi gücündən istifadə edib başda Həzbaniyyə tayfası olmaqla öz düşmənlərini ortadan qaldırdıqdan sonra razılaşmanı pozub, onları öldürmək istədi. Amma Vəhsudanın təşkil etdiyi xəyanət və sui-qəsd planının üstü açılınca bu dəfə oğuzlar Rəvvadilərə aid mülkləri talan etməyə başladılar.

Beləcə, Səlcuq oğuzların Azərbaycana gəlişi rəsmi bir dəvət üzərinə gerçəkləşmişdir. İlk gələn oğuz hərbi dəstələrinə Anasioğlu, Məsud, Dana, Gök Daş, Qızıl, Yağmur və Boğa kimi bəylər başçılıq edirid. Onlara mənbələrdə Yabqulu oğuzları adı verilir.