AzTV-nin sabiq sədrinin Ukraynadakı biznes imperiyası – FOTO

Azərbaycan Televiziya və Radio Verilişləri” (AzTV) Qapalı Səhmdar Cəmiyyətinin keçmiş sədri Arif Alışanovun Ukraynada restoran və ticarət obyektlərinin olması barədə xəbərlər əldə etmişik. 

AzEuroNews.com -a Ukraynadakı özəl mənbələrdən verilən məlumata görə, Ukraynanın Dnepropetrovsk bölgəsində "Bakinskiy Dvorik” adlı restoran və "Şəkər-bura” adlı çay evi fəaliyyət göstərir. 

Redaksiyamıza həmin restoranın fotosu da göndərilib. Göndərilən məlumatda qeyd olunur ki, sözügedən restoran və çay evinin əsl sahibi Arif Alışanovdur. Hazırda həmin restoranlara AzTV-nin Ukrayna və Şərqi Avropa ölkələri üzrə keçmiş müxbiri Möhsün Qədiroğlu nəzarət edir.

"Möhsün Qədiroğlu özü də bizə dəfələrlə deyib ki, bu restoran Arif Alışanova məxsusdur. Restorana daha çox azərbaycanlılar və Azərbaycandan Ukraynaya gedən qonaqlar dəvət olunur”– deyə məlumatı verən mənbə qeyd edib.

Məlumatı verən şəxs deyir ki, keçmiş AzTV sədrinin Ukraynadakı obyekti təkcə bunlar deyil. Onun Kiyev, Xarkov və digər əyalətlərdə də restoranları, ticarət obyektəri var. A.Alışanov həmin obyektlərə də nəzarəti M.Qədiroğluna tapşırıb.

Xatırladaq ki, Arif Alışanov 28 mart 2005-ci ildə dövlət başçısının sərəncamı ilə "Azərbaycan Teleradio Verilişləri” Qapalı Səhmdar Cəmiyyətinin sədr müavini, 16 avqust 2006-cı ildə isə sədr vəzifələrinə təyin olunub. Ölkə başçısının 15 yanvar 2019-cu il tarixli sərəncamı ilə "Azərbaycan Televiziya və Radio Verilişləri” Qapalı Səhmdar Cəmiyyətinin (AzTV) sədri vəzifəsindən azad olunub.

Hazırda onun səlahiyyətlərini sədr müavini Rövşən Məmmədov icra edir. R.Məmmədov bu vəzifəni icra edəndən AzTv-də köklü kadr dəyişikliyi edib.

Televiziyanın xaricdəki bir çox bürosunu bağlayıb. Onların arasında Möhsün Qədiroğlunun rəhbərlik etdiyi Ukrayna və Şərqi Avropa bürosu da var.

R.Məmmədovun bu yaxınlarda prezidentin sərəncam ilə AzTV-yə rəhbər gətirilməsi də yayılan xəbərlər arasındadır.