Azərbaycanda 500 min nəfər təhlükədədir

Hazırda Azərbaycanda əhalisi 500 min nəfərdən çox olan 344 yaşayış məntəqəsi və yüzlərlə təsərrüfat obyekti sürüşmə təhlükəsi altındadır.

Anews.az-ın məlumatına görə, bunu Trend-ə tədqiqatı aparmış Milli Elmlər Akademiyasının Coğrafiya İnstitutunun Azərbaycanın iqtisadi və siyasi coğrafiyası şöbəsinin müdiri, coğrafiya üzrə elmlər doktoru Nəriman Paşayev deyib.

Alim bildirib ki, Azərbaycanda sürüşmələrin mütəmadi olaraq təkrarlandığı, əhaliyə və təsərrüfata güclü ziyan vurduğu rayon və şəhərlər İsmayıllı, Ağsu, Şamaxı, Quba, Qusar, Bakı və Mingəçevir daxildir. Bu ərazilərdə il ərzində düşən yağıntıların miqdarı 150-200 mm-dən 600-1000 mm-ə qədər, seysmiklik isə 8-9 bal təşkil edir. Hər il sürüşmə nəticəsində həmin ərazilərdə iqtisadiyyata 6-10 milyon manat həcmində ziyan dəyir.

N.Paşayev qeyd edib ki, sürüşmələrin vaxtaşırı təkrarlandığı, əhaliyə və təsərrüfata daha çox ziyan vurduğu rayonlara Xızı, Şabran, Siyəzən, Qobustan, Şahbuz, Culfa, Lerik, Yardımlı daxildir. Burda əhalisi 51,4 min nəfər olan 80 yaşayış məntəqəsi daim sürüşmə təhlükəsi altında fəaliyyət göstərir. Bu ərazilərə sürüşmələrdən il ərzind orta hesabla 4,5-6 milyon manat ziyan dəyir.

Alimin sözlərinə görə, Azərbaycanda sürüşmələrin 2-3 ildən bir təkrarlandığı, əhaliyə və təsərrüfat sisteminə çox ziyan vurduğu sürüşmə rayonuna Samux, Göygöl, Gədəbəy, Daşkəsən, Ordubad bölgələri daxildir:

"Rayon ərazisində antropogen fəaliyyətin genişlənməsi ilə əlaqədar sürüşmələr də getdikcə areallarını genişləndirir. Burada hazırda əhalisi 39,3 min nəfər olan 37 yaşayış məntəqəsi sürüşmə təhlükəsi altındadır".

N.Paşayev əlavə eib ki, Azərbaycanda sürüşmələrin 3-5 ildən bir təkrarlandığı, əhaliyə və təsərrüfat sisteminə orta dərəcədə ziyan vurduğu rayona Tovuz, Qazax, Lənkəran, Goranboy, Qəbələ, Şəki bölgələri daxildir. Bu rayonda hazırda 18 min nəfər əhalisi olan 25 yaşayış məntəqəsi sürüşmə riski altındadır.

Tədqiqatçı qeyd edib ki, sürüşmələrin 5-6 ildən bir təkrarlandığı, əhaliyə və təsərrüfat sisteminə az ziyan vurduğu rayona Astara, Masallı, Xaçmaz, Zaqatala, Balakən, Oğuz, Abşeron, Cəlilabad, Şərur və Kəngərli əraziləri daxildir. Hazırda bu ərazilərdə əhalisi 37,1 min nəfər olan 23 yaşayış məntəqəsində sürüşmə prosesi yayılıb.

N.Paşayev bildirib ki, Azərbaycanda sürüşmələrin 6-10 ildən bir təkrarlandığı, əhaliyə və təsərrüfat sisteminə çox ziyan vurduğu rayona Sədərək bölgəsi və Aran iqtisadi rayonun ərazisini kəsib keçən Kür və Araz çaylarının hövzələri aiddir.