Azərbaycanda bir ildə övladlığa götürülən uşaqların sayı açıqlandı

2018-ci ildə Azərbaycanda 751 uşaq övladlığa götürülüb.

Bu barədə Dövlət Statistika Komitəsi məlumat yayıb.

Bu da 2017-ci illə müqayisədə, 14,4 faiz azdır. Əvvəlki ilə nisbətən övladlığa götürülən oğlanların sayı 13,7 faiz azalaraq, 402 nəfər, qızların sayı 15,1 faiz azalaraq, 349 nəfər olub. 

2018-ci ildə əvvəlki illə müqayisədə, övladlığa götürülmüş üç yaşa qədər olan uşaqların sayında 10,5 faiz, 3-5 yaşlı uşaqların sayında 19,2 faiz, 6-10 yaşlı uşaqların sayında 21,0 faiz, 11-17 yaşlı uşaqların sayında isə 11,9 faiz azalma müşahidə olunub və bu yaş qruplarında müvafiq olaraq 376, 139, 132 və 104 uşaq övladlığa götürülüb.

Ötən il ərzində əcnəbilər və vətəndaşlığı olmayan şəxslər tərəfindən 14 uşaq övladlığa götürülüb ki, onların da dördü qızdır.

2018-ci ildə Azərbaycan Respublikasının məhkəmələri tərəfindən ləğv edilmiş övladlığa götürülməsi barədə qərarların sayı əvvəlki illə müqayisədə 15,5 faiz artaraq 67 olub.