Şəkidə qadın qonşusunu bogub evini taladı

Şəkidə qonşusuna qarşı soyğunçuluq etməkdə təqsirli bilinən qadın məhkəməyə şikayət edib.

"Ölkə.Az" xəbər verir ki, qonşusuna qarşı soyğunçuluq etməkdə təqsirli bilinən Nuranə Mahmudovanın şikayətinə aprel ayının 9-da Şəki Apellyasiya Məhkəməsində hakim Rafail Əliyevin sədrliyi ilə keçirilən prosesdə baxılacaq.

Qeyd edək ki, rayonun Bağbanlar küçəsində yaşayan İmanova Fəridə Mahmud qızı polisə müraciət edərək bildirib ki, yaşadığı mənzildəki sandıqdan 500 manat naməlum şəxs tərəfindən oğurlanıb.

Aparılan araşdırmalar zamanı məlum olub ki, həmin gün F.İmanovanın qonşusu, Mahmudova Nuranə Güloğlan qızı evin qapısının açıq olduğunu bilərək mənzilə daxil olub. O, özü ilə gətirdiyi dəmirkəsənlə sandıqın qıfılını kəsib və oradan 500 manatı götürüb. Bu zaman ev sahibəsi Fəridə İmanova mənzilə daxil olub. Vəziyyətin pisləşdiyini görən N.Mahmudova qonşu qadına hücum edərək onu boğmağa başlayıb və bu barədə kiməsə məlumat verməməsini tələb edib. O, sandıqdan götürdüyü 500 manatı özü ilə aparıb. Cinayəti törətməkdə şübhəli bilinən Nuranə Mahmudova polis əməkdaşları tərəfindən saxlanılıb.