Sabah hava necə olacaq?

İstirahət günü Bakının bəzi ərazilərində intensiv yağışlar yağacaq.

Ekologiya və Təbii Sərvətlər Nazirliyinin Milli Hidrometeorologiya Departamentindən Trend-ə bildiriblər ki, sentyabrın 28-də Bakı və Abşeron yarımadasında buludlu hava şəraiti üstünlük təşkil edəcək, arabir yağış yağacaq. Gecə saatlarında yarımadanın bəzi ərazilərində intensiv olacağı ehtimalı var. Mülayim cənub-şərq küləyi əsəcək.

Bakı və Abşeron yarımadasında sentyabrın 28-də havanın temperaturu gecə 17-19, gündüz 20-24 dərəcə isti olacaq.

Azərbaycanın rayonlarında, əsasən də dağlıq və dağətəyi rayonlarda sentyabrın 28-də gecə və axşam saatlarında şimşək çaxacaq, yağış yağacaq, səhər ayrı-ayrı yerlərdə duman olacaq, şərq küləyi arabir güclənəcək.

Aran rayonlarında havanın temperaturu gecə 13-18, gündüz 23-28 dərəcə, dağlarda gecə 4-9, gündüz 12-17 dərəcə isti olacaq.

Qeyd edək ki, Azərbaycan sinoptikləri ölkədə hava şəraitinin pisləşəcəyi barədə xəbərdarlıq edib.

Xəbərdarlığa görə, sentyabrın son günlərində ölkə ərazisində qeyri-sabit hava şəraitinin üstünlük təşkil edəcəyi, fasilələrlə yağış yağacağı gözlənilir, sentyabrın 29-30-da isə hava şəraitinin daha da kəskinləşəcəyi, şimal-qərb küləyinin güclənəcəyi, bəzi ərazilərdə isə şiddətlənəcəyi ehtimalı var. Sentyabrın 29-30-da havanın temperaturu ötən günlərlə müqayisədə kəskin - 5-10 dərəcə enəcək.

ANN.Az