"Azərbaycan gözəli" danışdı: "Dövlət qurumunda işləyirəm, modellik isə hobbimdir"

Azərbaycan Dövlət İqtisad Universitetinin məzunu Melisa Nuriyeva "Azərbaycan gözəli 2019" yarışmasının qalibi olub. "Azərbaycan gözəli 2019" müsabiqəsi son zamanlar sosial şəbəkələrdə geniş müzakirə olunur.

Unikal.org adıçəkilən müsabiqənin qalibi Melisa Nuriyeva ilə müsahibəni oxuculara təqdim edir:

- Modelliklə çoxdan məşğulsunuz, yoxsa bu sahədə yenisiniz?

- Mən dövlət qurumunda işləyirəm, modellik sadəcə olaraq mənim hobbimdir. Bu yarışmaya da maraq üçün qatılmışam.

- Müsabiqəyə kiminsə məsləhəti ilə qatıldınız?

- Modellik mənim uşaqlıq arzum olduğuna görə öz istəyimlə bu yarışda iştirak etdim. Hobbi olaraq kliplərə, filmlərə də çəkilirəm.

- Hansı filmlərə çəkilmisiniz?

- Mən dövlət qurumunda işlədiyim üçün vaxtım bir o qədər də çox deyil. Buna görə də baş rola çəkilmək üçün edilən təklifləri qəbul etmirəm. İstəmirəm vaxtımı boş yerə sərf edim.

 - Qalib olandan sonra sizi təbrik edən oldumu?

- Təbrik edənlər çox oldu.Hamı sosial şəbəkədə yazır, zəng edib, təbrik edir.

- Qalib olandan sonra sizi çox müzakirə etdilər. Tənqid edənlərə münasibətiniz necədir?

- Məndə heç vaxt, heç kəsə qarşı paxıllıq olmayıb. Hər kəs öz ürəyinə görə danışır. Mən elə şeylərə fikir vermirəm. Mən onların fikirlərinə  hörmətlə yanaşıram.

- Bəs, beynəlxalq gözəllik yarışmalarına qatılımaq istəyirsiniz?

- Azərbaycan gözəli kimi ölkəmizi xaricdə təmsil edə bilərəm. Mən bütün işimi atıb aylarla, günlərlə xarici ölkələrə getsəm bu mənə sərf etməz. Mənim öz işim var.

- Həmçinin sizin müsabiqədə qalib olduğunuza şübhə ilə yanaşanlar da var. Ümumiyyətlə bu qalibiyyət tapşırıqla olub?

- Orada hər sahə üzrə münsiflər var idi. Onlar mədəniyyət, moda və s. sahələri təmsil edirdilər. Bu onların verdiyi qərardı.Tapşırıq olsaydı öz sahəmdə, yəni dövlət qurumunda yüksək vəzifəyə təyin olunardım.