Mərkəzi Klinik Xəstəxanada xəstələrin yaxınlarını necə müflis edirlər?

"İRİN VƏ QAN DEPOZİTİ...

Son vaxtlar xidmət sektorunda depozit dəbi ortaya çıxıb. Hansı restorana girirsən deyir 100-150 manat ödəyib sonra yeməyə başlamalısan. İlk dəfə bunu öz qohumlarının əmlakını fırıldaq yolu ilə ələ keçirməkdə adı hallanan "Neolit" restoranının müdirinin tətbiq etdiyinin şahidi oldum.

Müğənni Damlanın dostu tərəfindən əsası qoyulan bu proses indi əksər restoranlarda tətbiq edilir. Mexanizm belədir. Kabinetə girən kimi səndən depozit alırlar. Yəni sən minimum ödədiyin depozit qədər yeməlisən. Ondan az yesən belə pulu sənə qaytarmırlar. Çox yesən isə depozitdən əlavə pul verməlisən.

Restoranların bu istiqamətdə fəaliyyətlərini  başa düşmək olar. Ora adətən pulu olan adamlar gedir. Hazırda restoranlardan da pis depoziti fırıldağını insanların əlacsızlıqdan üz tutduğu xəstəxanalar tətbiq edir.

Onkoloi xəstəlikdən əziyyət çəkən bir qohumumzla bağlı yaşananlar məni dəhşətə gətirdi. Ailə 8 ay idi ki, xərçənglə mübarizə aparırdı. Xəstəni aparmadıqlarıi yer, xərcləmədikləri pul qalmadı.

Nə əmlakları varsa satdılar. Ən son günlərdə isə vəziyyəti ağırlaşan xəstəni Mərkəzi Klinik Xəstəxanaya yerləşdirdilər. Xəstənin qohumlarına deyiblər ki, bir dərman var onu vursaq sağalar.

Qiyməti 5 min manat olan həmin dərmanı Moskvadan gətizdirib ömrünün son günlərini yaşayan xəstəyə vurublar. Sonra isə Mərkəzi Klinik Xəsətxanada qalmaq üçün hər gününə 1500-2000 manat depozit ödətdiriblər.

Təsəvvür edirsinizmi, həkimlər öləcəyini bildiyi xəstəni orda saxlamaqla 20000 manata yaxın pul qazanıblar. Hər halda, xəstənin hansı vəziyyətdə olduğunu onlardan yaxşı kimsə bilə bilməzdi.

Onsuz da, sağalmaq üçün çarəsi olmayan xəstənin yaxınlarına deyə bilərdilər ki, can verən adamı aparın evinizdə ölsün. Amma ümid verməklə, müflis olan ailəni borca girməyə vadar edib, qanını sorublar. Ən dəhşətlisi isə depozit məsələsidir.

Məlum olub ki, əvvəlcədən depozit qoymasan hansı vəziyyətə düşməsindən asılı olmayaraq, xəstəni çölə atırlar. Xəstə dünyasını dəyişib canını qurtarır. Amma ailə fikirləşir ki, yasdan sonra nəyi satıb Mərkəzi Klinik xəstəxanaya versinlər ki,  borcları bağlansın. 

Son vaxtlar rastaşdığımız mənzərələr onu deməyə əsas verir ki, səhiyyəmiz vətəndaşlarımıza sanki əsir düşərgəsi qanunları ilə rəftar edir. Belə yolla əldə edilən vəsait qazanc yox, irin və qandır.