Azərbaycanda uçqun - "Azərsu"nun əməkdaşları torpaq altından çıxarıldı - Yeniləndi

Ucar rayonunda təmir işləri zamanı baş verən uçqun nəticəsində palçıq kütləsinin altında qalan iki nəfərin "Azərsu” ASC əməkdaşları olduğu məlum olub.



Bu barədə qurumun mətbuat xidmətinin rəhbəri Anar Cəbrayıllı Report-a açıqlamasında deyib:
"Ucar şəhərində kanalizasiya xəttində qəza aradan qaldırılarkən baş vermiş torpaq uçqunu zamanı 2 əməkdaş xəsarət alıb. Onların həyatı üçün təhlükə yoxdur. Vilnur Sadıqov adlı əməkdaşımız hazırda Ucar Rayon Mərkəzi Xəstəxanasında müayinə olunur”.
***
20:07
Ucarda uçqun altında qalan iki nəfər xilas edilib.
Fövqəladə Hallar Nazirliyindən Anews.az-a verilən məlumata görə, Böhran Vəziyyətlərində İdarəetmə Mərkəzinə Ucar rayonunda yeraltı su xətlərində təmir işləri aparılan zaman yaranan uçqun nəticəsində 2 nəfərin palçıq kütləsinin altında qalması barədə məlumat daxil olub.
Hadisə yerinə Dövlət Yanğından Mühafizə Xidmətinin müvafiq xilasetmə qüvvələri cəlb olunub.
Görülən tədbirlər nəticəsində 2 nəfər xilas olunaraq aidiyyəti üzrə təhvil verilib. Əməliyyat başa çatıb.

www.anews.az