Uşaqpulu bərpa olunsun! - Milli Məclisdə məsələ qaldırıldı

"Uşaq əməyinin istismarı ilə bağlı, onların insan alverinin qurbanı çevrilməsi barədə ciddi işlər görməliyik”.

Modern. az xəbər verir ki, bunu Milli Məclisin iclasında deputat Fazil Mustafa deyib.

O bildirib ki, hər birimizin hökumət qarşısında təkliflərlə çıxış etməsi vacibdir:

"O təkliflər nədən ibarət ola bilər?! Göstərilir ki, valideynlərin inzibati məsuliyyətə cəlb edilməsi ilə bağlı tənbeh verilib. Bu, yetərli deyil. Bununla uşağın problemi həll olunmur. Bunun yolu odur ki, işlər aparılmalıdır. Təhsil Nazirliyinin "Məktəblinin dostu” layihəsi çərçivəsində burada iştirak edən məktəblilərimizlə əməkdaşlığı gücləndirməliyik. İkinci vacib məsələ odur ki, bu uşaqların böyük əksəriyyəti valideyn himayəsindən məhrum olanlardır.

Ona görə də ölkədə aliment fondunun bərpası haqqında düşünməliyik. İqtisadçıların hesablamalarına görə bu fondun təşkili üçün 12-13 milyon vəsait lazımdır. Bu həm də o vəsaitdir ki, dövlət özü büdcəsindən alimenti uşaqlara bu fond vasitəsilə ödəyir. Sonradan onu aliment ödəməyən valideyndən məcburi qaydada geri alır”.

Deputat uşaqpulunun bərpası barədə də təklif səsləndirib:

"Mütləq uşaqpulunu bərpa etməliyik. Ən azından 6 yaşına qədər uşaqlar arasında bu pul bərpa olunmalıdır. Statistika göstərir ki, uşaqlar arasında yoxsulluq səviyyəsi 10 % təşkil edir. Ona görə də düşünmək lazımdır”.