Payızlıq və yazlıq dənli bitkilərin əkin sahələrindən 3,2 mln. ton məhsul yığılıb

2019-cu il avqust ayının 5-nə olan məlumata əsasən payızlıq və yazlıq dənlilər və dənli paxlalı (qarğıdalısız) bitkilər üzrə biçilməsi nəzərdə tutulan 1039,5 min hektar sahənin 1026,5 min hektarı və yaxud 98,7%-i biçilərək məhsulu yığılıb.

Dövlət Statistika Komitəsindən "APA-Economics”ə verilən məlumata görə, toplanan məhsul 3218,0 min ton təşkil edib və məhsuldarlıq 31,4 sentnerə bərabər olub. Yığılan məhsulun 2167,1 min tonu və yaxud 67,4%-i buğda, 1014,9 min tonu (31,5%-i) arpa, 36,0 min tonu (1,1%-i) digər dənlilər və dənli paxlalı bitkilərdir.

Ölkənin 22 rayonunda və Naxçıvan Muxtar Respublikasında dənlilərin və dənli paxlalı (qarğıdalısız) bitkilərin biçini tam başa çatıb. 33 rayonda biçilməsi nəzərdə tutulan sahənin 90,0%-dən çoxu biçilib, digərlərində isə biçinin aparılma səviyyəsi 90%-dən aşağı olub.

25 rayon üzrə dənlilərin və dənli paxlalı (qarğıdalısız) bitkilərin məhsuldarlığı ölkə üzrə orta göstəricidən yuxarı olub. Ən yüksək məhsuldarlıq Bərdə (1 hektardan 43,1 sentner), Saatlı (müvafiq olaraq 41,4), Sabirabad (39,8), Tərtər (38,8), Ağdam (38,4), Salyan (38,0), İmişli (37,2),  Ağcabədi (36,1), Cəlilabad (35,0) və İsmayıllı (34,8) rayonlarında olub.

Dənlilərin və dənli paxlalı (qarğıdalısız) bitkilərin digər rayonlara nisbətən daha yüksək istehsalı Şəki şəhərində (235,9 min ton), Cəlilabad (237,7 min ton), Kürdəmir (162,0 min ton), Ağsu (116,7 min ton), Füzuli (115,0 min ton), Neftçala (112,1 min ton), Ağcabədi (105,3 min ton) rayonlarında və Naxçıvan Muxtar Respublikasında (109,8 min ton) müşahidə olunub. 

www.anews.az