Bakı məhkəməsi ilk dəfə onlayn rejimdə ömürlük məhkumların iddialarına baxacaq

13.11.2019 11:59

Qobustan Qapalı Həbsxanasında saxlanılan və ömürlük azadlıqdan məhkum edilmiş məhkumların sağlamlıqlarına vurulan zərərlə bağlı iddialarına bu gün 2 saylı Bakı İnzibati-İqtisad Məhkəməsində baxılacaq.

Azərbaycan məhkəmə prosesləri tarixində ilk dəfə olaraq mühakimə olunanların iştirakı videobağlantı vasitəsilə onlayn təmin ediləcək.
Bu barədə Oxu.Az-a məhkumların yaxınları məlumat verib.

1971-ci il təvəllüdlü Natiq Mirzəyev və kamera yoldaşı, 1977-ci il təvəllüdlü Namiq Vəliyev məhkəməyə müraciət ediblər. Onlar cəzaçəkmə müəssisəsindəki dəhşətli saxlanma şəraitindən şikayət ediblər. Qeyd ediblər ki, bunun nəticəsində dəmir barmaqlıqlar arxasında tutulduqları bütün xəstəliklər xroniki mərhələyə keçib. Bundan əlavə, dustaqlar keyfiyyətsiz qidadan da şikayət ediblər.

22 ili dəmir barmaqlıqlar arxasında keçirən Natiq Mirzəyev məhkəməyə verdiyi iddia ərizəsində ona dəyən ziyanı 15 min avro dəyərləndirərkən, 24 ildir həbsdə olan Namiq Vəliyev sağlamlığına dəyən ziyanı ödəmək üçün 20 min avro tələb edib.

Məhkəmə iclası saat 16:00-a təyin olunub.

Qeyd edək ki, N.Mirzəyev 1997-ci ildə tutulub və Cinayət Məcəlləsinin bir sıra maddələri, o cümlədən, şəxsi mənfəət üçün odlu silahdan istifadə ilə törədilmiş qəsdən ağırlaşdırılmış qətl maddəsi ilə 2000-ci ildə məhkum edilib. Cinayət 1994-cü ildə törədilib.

N.Vəliyev ərlə arvadı xüsusi amansızlıqla və şəxsi mənafe üçün öldürdüyünə görə məhkum edilib.

O, 1996-cı ilin avqustunda Şakir Rzaxanov və Şəmsi Salmanovla əlbir olaraq, T.Quliyev və həyat yoldaşı, dörd aylıq hamilə olan S.Əliyevanın qətlində iştirak etməkdə ittiham olunub.

Cinayət işinin materiallarına görə, N.Vəliyev, Ş.Rzaxanov və Ş.Salmanov Bayıl kəndində 20-ci hissə ərazisində yaşayan dostu T.Quliyevin yanına gəliblər. Spirtli içki qəbul etdikdən sonra cinayətkarlar ərlə arvadın əl-qolunu bağlayıb, işgəncə verərək pulun və qızıl-zinət əşyalarının saxlandığı yerin göstərilməsini tələb ediblər. Sonra onlar pul, qızıl və bir maşın oğurlayaraq evi yandırıblar. Məhkum olunanların heç biri günahlarını tam etiraf etməyib.

Bütün sübutların işgəncə altında istintaq tərəfindən əldə edildiyini iddia edirlər. Bununla əlaqədar olaraq, cəza müddətinin (ömürlük azadlıqdan məhrumetmə) yenidən baxılması tələbi ilə məhkumlar dəfələrlə aclıq aksiyası keçiriblər və müxtəlif məhkəmələrə müraciət ediblər.

www.anews.az

Xəbəri bəyəndiniz?

Sosial şəbəkələrdə paylaş