Orxan Zeynalovun atası dövlətdən kömək istədi

Moskva sakini Yeqor Şerbakovu qətlə yetirməkdə şübhəli bilinərək 17 il müddətinə həbs cəzası alan Orxan Zeynalovun atası Zahid Zeynalov Azərbaycan dövlətindən kömək istəyib.ANN.Az AzVision.az-a istinadən xəbər verir ki, açıqlamasında oğlunun günahsız olduğunu deyən Z.Zeynalov bu işdə Azərbaycan dövlətinə güvəndiyini deyib.“Bu işlə dövlət məşğul olur. Mən başqa nə deyə bilərəm ki?”- deyə Zeynalov qeyd edərək oğlunun həbsi barədə artıq danışmaq istəmədiyini bildirib.Qeyd edək ki, ötən il oktyabrın 10-da Rusiya paytaxtının Qərbi Birulyovo rayonunda 25 yaşlı Y.Şerbakovun qafqazlı tərəfindən qətlə yetirilməsi yerli sakinlərin etirazına səbəb olub. Qatilin tapılmasını tələb edən yüzlərlə rus milliyyətçisi və “skinhedlər” Qərbi Birulyovo rayonunda yerləşən “Biryuza” ticarət mərkəzi və “Pokrov” meyvə-tərəvəz bazasına hücum edərək orada çalışan Qafqaz və Orta Asiyadan olan miqrantları döyüblər. Hadisə yerinə xüsusi təyinatlı polis dəstələri yeridilib. “Skinhedlər” polislərə də müqavimət göstəriblər. Onlar ticarət mərkəzində yerləşən mağazalara, ətrafdakı obyektlərə və avtomobillərə ciddi zərər vurublar. İğtişaş nəticəsində xeyli sayda miqrant və yerli sakin yaralanıb.Y.Şerbakovun qətlində şübhəli bilinən Azərbaycan vətəndaşı O.Zeynalov oktyabrın 15-də Moskva ətrafındakı Kolomna şəhərində saxlanılıb və vertolyotla Moskvaya aparılıb.O, ilkin dindirmə zamanı qətli özünümüdafiə məqsədi ilə törətdiyini söyləyib.Buna baxmayaraq, məhkəmə ona 17 il həbs cəzası kəsib.ANN.Az