Yusif Bağırzadə: "Siyasi islahatların həyata keçirilməsində dialoqun alternativi yoxdur"

"Parlament seçkilərindən sonra Prezident Adminstrasiyasının müvafiq şöbəsinin siyasi partiyalarla görüşlərinin şahidi oluruq ki, bu da olduqca təqdirəlayiqdir.

 

Əgər son dövrlərə qədər siyasi partiyalarla iş Prezident Adminstrasiyası şöbələrinin birinin tərkibində kiçik bir sektor vasitəsilə həyata keçirilirdisə, dəyişikliklərdən sonra siyasi partiyalarla əlaqələrə cavabdeh ayrıca bir şöbənin yaradılması, eləcə də şöbə rəhbərinin heç bir ayrıcalıq tanımadan bütün siyasi partiyalarla görüşlərə cəhd etməsi alqışlanmalıdır".

Bunu Axeber.az-a açıqlamasında politoloq Yusif Bağırzadə deyib. Onun sözlərinə görə, keçirilən görüşlər nə qədər tanışlıq xarakterli olsa da, bu görüşlərdə siyasi partiyalara müvafiq təkliflərə çıxış etmək imkanları da tanınır. Eyni zamanda parlamentin yeni tərkibdə ilk iclasında Prezidentin çıxışından da görünür ki, görüşlərlə bağlı təklif birbaşa Prezident tərəfindən verlib və o özü də bu görüşlərə xüsusi önəm verir:

 

"Siyasi islahatların keçirilməsinin vacibliyinə toxunan Prezident bu mərhələdə bütün tərəflərlə dialoqun mühümlüyünə də toxundu ki, bunun özü də qarşımızda duran dövrdə Azərbaycanda artıq demək olar ki, sıradan çıxmış partiyalaşma institutunun yenidən bərpa olunacağı ilə bağlı nikbin proqnozlar verməyə imkan verir. Siyasi partiyaların önəminin artırılması ilə bağlı ilk addım isə artıq atılıb. Parlamentin rəhbərliyinin formalaşmasında, eləcə də komitələrin rəhbərliyinin tərkibində parlament müxalifəti təmsilçilərinin rəhbər vəzifələrə gətirilməsi buna ən yaxşı nümunədir".

Y. Bağırzadə deyib ki, islahatların alternativinin olmadığı kimi, siyasi islahatların da həyata keçirilməsində dialoqun alternativi yoxdur.

"Lakin təəssüf ki, yenə də həmişə olduğu kimi bu təşəbbüsə kölgə salmaq istəyən siyasi partiyalar da tapıldı. Müvafiq görüşlərdən imtina yolu tutmuş bəzi siyasi partiyalar növbəti dəfə Azərbaycanda sağlam dialoq mühitinin formalaşması və xüsusən də problımelərin danışıqlar və müzakirələr yolu ilə aradan qaldırılmasında maraqlı olmadıqlarını ortaya qoydular ki, bu da cəmiyyətin bütün sağlam düşüncəli təbəqələri tərəfindən qınanmalıdır.

 

Bu kimi təşəbbüslərə qapalı olan və onsuz da kövrək olan cəmiyyəti radikal addımlara sürükləyən siyasilər başa düşməlidilər ki, istənilən cəmiyyətdə dayanıqlı və davamlı inkişafa inqlablar və xaos yolu ilə deyil məhz dialoq əsasında həyata keçirilən islahatlar vaistəsi ilə nail olmaq mükündür", - deyə politoloq qeyd edib.