Əhalinin NƏZƏRİNƏ! Bunu edənlər 200 manat cərimə olunacaq - VİDEO

Paytaxt polisi koronavirus təhlükəsi ilə bağlı vətəndaşların küçə və prospektlərdə, parklarda və digər ictimai yerlərdə kütləvi toplaşmasının qarşısını almaq məqsədi ilə onlarla maarifləndirici söhbətlər aparır.

BAKU.WS APA TV-yə istinadla məlumat verir ki, Nazirlər Kabineti yanında Operativ Qərargahın tələblərinə uyğun olaraq paytaxtda yerləşən bütün parklar vətəndaşların istifadəsi üçün məhdudlaşdırılıb:

Koronavirus pandemiyası ilə mübarizə aparmaq məqsədi ilə ölkəmizdə tətbiq olunan xüsusi karantin rejimi çərçivəsində vətəndaşların parklara girişi və çıxışı məhdudlaşdırılıb. Hazırda Nərimanov metrostansiyası yaxınlığında yerləşən parklardan birindəyik. Demək olar ki, parkda heç bir vətəndaşa rast gəlmək mümkün deyil.

Nərimanov Rayon Polis İdarəsinin Baş inspektoru, polis kapitanı Fuad Sultanov deyir ki, polisin rayon ərazisindəki apardığı bütün profilaktik tədbirlər ölkəmizdə tətbiq olunan xüsusi karantin rejiminin tələblərinə uyğun olaraq həyata keçirilir:

"Azərbaycan Respublikası Nazirlər Kabineti yanında Operativ Qərargahın tələblərinə uyğun olaraq Nərimanov rayon Polis idarəsinin əməkdaşları mütəmadi olaraq ictimaiyyətin sıx toplaşdığı yerlərdə profilaktika işləri aparır. Çalışırıq ki, əhali bir yerə çox toplaşmasın. İnsanlar yaxın təmasdan yayınsınlar. Vətəndaşlar qərargahın qoyduğu şərtlərə ciddi əməl etsinlər”.

Baş inspektor qeyd edir ki, qaydalara əməl etməyən vətəndaşlar ciddi şəkildə cəzalandırılacaq: "Karantin şərtlərinə əməl etməyən şəxslər barəsində Azərbaycan Respublikasının inzibati xətalar məcəlləsinin 211-ci maddəsi ilə protokol tətbiq olunaraq həmin şəxslərə 100 manatdan 200 manata qədər cərimə tətbiq olunur”.

Vətəndaşlar da ölkə ərazisində xüsusi karantin rejiminin tətbiq olunmasından razıdırlar və onlar hər kəsi sözügedən qanunun tələblərinə əməl etməyə çağırırlar:

- Hər birimiz verilən qərarları yerinə yetirməliyik. Çünki bu, millətimiz üçün, xalqımız üçün, dövlətimiz üçün çox yararlı bir haldır. Hamıya da tövsiyə edirəm ki, qaydalara əməl etsinlər.

- Nə edirlərsə, bizim sağlamlığımız üçündür. Biz də hər şeyə əməl edirik ki, təki bu bəla dövlətimizin, xalqımızın üstündən çəkilsin getsin. Yenə əvvəlki kimi öz iş rejimimizə, yaşayışımıza qayıdaq.

- Bu addımı yüksək qiymətləndirirəm. Amma gərək hamı buna əməl etsin. Yəni hər kəs öz təhlükəsizliyinə özü cavabdehdir. Əgər özü yaşamaq istəyirsə, əzizlərinin, doğmalarının yanında qalmaq istəyirsə, gərək özünü mühafizə eləsin. Hər kəs dövlətin qanunlarına əməl etsin.

Polis əməkdaşları parkın giriş və çıxışında toplaşan və taksi fəaliyyəti ilə məşğul olan vətəndaşlara qoruyucu maskalardan, tibbi spirtdən və digər dezinfeksiyaedici məhlullardan istifadə etməyi tövsiyə edir.