Sərnişin daşıyan sürücülər arasında koronavirusa yoluxan var? - RƏSMİ AÇIQLAMA

Anews.az bu barədə Nəqliyyat, Rabitə və Yüksək Texnologiyalar Nazirliyi yanında Dövlət Avtomobil Nəqliyyatı Xidmətinə (DANX) istinadən xəbər verir. 

Məlumata görə, 1-3 aprel tarixləri ilə müqayisədə 13-15 aprel tarixləri üzrə şəhərdaxili (rayondaxili) avtobus marşrutları ilə (Bakı şəhəri istisna olmaqla) daşınan sərnişin sayı 68,4 % azalıb. 

Həmçinin, fəaliyyətinə icazə verilən yeganə şəhərlərarası avtobus marşrutları olan "Bakı-Sumqayıt”, "Bakı-Abşeron” və "Sumqayıt-Abşeron” xətləri üzrə 1-3 aprel tarixlərində 75 400, 4-6 aprel tarixlərində 54 405, 7-9 aprel tarixlərində 45 275, 10-12 aprel tarixlərində 43 460 və 13-15 aprel tarixlərində 46 160 sərnişin daşınıb. 1-3 aprel tarixləri ilə müqayisədə 13-15 aprel tarixləri üzrə "Bakı-Sumqayıt”, "Bakı-Abşeron” və "Sumqayıt-Abşeron” avtobus marşrutları ilə daşınan sərnişin sayı 38,8 % azalıb. 

Ümumilikdə, xüsusi karantin rejiminə qədərki dövrlə müqayisədə daşınan sərnişin sayı 85% azalıb. Ötən müddət ərzində sərnişindaşıma fəaliyyəti göstərən sürücülər arasında koronavirusa yoluxma halı qeydə alınmayıb. Avtobusların salonlarında və dayanacaqlarda sərnişinlər tərəfindən sosial məsafəyə riayət edilməsinin təmin edilməsi məqsədi ilə xidmətin əməkdaşları tərəfindən gündəlik nəzarət tədbirləri davam edir.
www.anews.az