Ölkədə gübrə təminatında problem olacaqmı?

"Bu ilin birinci rübü ərzində təchizatçı şirkətlər tərəfindən fermerlərə 72 min ton gübrə satılıb ki, bu da ötən ilin müvafiq dövrü ilə müqayisədə 19,3 faiz çoxdur”.

Bu barədə "Report”a Kənd Təsərrüfatı Nazirliyi yanında Aqrar Tədqiqatlar Mərkəzinin (ATM) direktoru Firdovsi Fikrətzadə ölkədə gübrə təminatının azalması ilə bağlı yaranmış suallara aydınlıq gətirərkən deyib.

Onun sözlərinə görə, bu dövr ərzində 65 min ton gübrə idxal edilib, həmçinin 17,2 min ton gübrə Azərbaycanda fəaliyyət göstərən karbamid zavodu tərəfindən təmin olunub: "Elektron İnformasiya Sistemində gübrə təminatı ilə məşğul olan 85 nəfər hüquqi və fiziki şəxs qeydiyyatdan keçib. Gübrə təchizatçılarının anbarlarında 80 min tondan çox mineral gübrə qalığı var.

 

Mövsümün növbəti mərhələsi üçün tədarük edilib hazır saxlanılır”.