Milli Mətbuat Günündə mükafatlar paylanacaq

Redaksiyalara pul verilməsi nəzərdə tutulmayıbBu il Milli Mətbuat Günündə KİV-in İnkişafına Dövlət Dəstəyi Şurası ilə Mətbuat Şurasının ənənəvi bayram tədbiri keçiriləcək. Bu barədə “Yeni Müsavat”a açıqlamasında MŞ sədri Əflatun Amaşov bildirdi. Onun sözlərinə görə, hazırda tədbirlə bağlı bəzi detallar dəqiqləşməyib, son hazırlıq işləri tamamlanır. Bu səbəbdən də bayramın keçiriləcəyi məkan, saat, eləcə də bəzi detallar dəqiq deyil. Amma 22 iyulda keçiriləcək bayram tədbirində jurnalistlərin mükafatlandırılacağı gözlənilir. Bu mükafatlar KİVDF-nin jurnalist müsabiqəsinin qalibləri üçün nəzərdə tutulub. Bundan başqa, bir çox jurnalistlərə Ali Media Mükafatı da veriləcək. Hələ ki, Ali Media Mükafatının qalibləri bəlli deyil. Bununla bağlı müzakirələr aparılır. Müsahibimiz dedi ki, bayram münasibətilə redaksiyalara birdəfəlik yardım ayrılması nəzərdə tutulmayıb. Ə.Amaşov dedi ki, bu ənənənə KİVDF yaranana qədər mövcud idi. Amma daha sonra sözügedən qurumun yaranması ilə ildə iki dəfə redaksiyalara yardım ayrıldı və Milli Mətbuat Günündə yardım qüvvədən düşdü. Xatırladaq ki, Mətbuat Şurasının təsis etdiyi Ali Media Mükafatının ötənilki laureatları aşağıdakılar olub: 1-ci dərəcəli Ali Media Mükafatı Bakı Dövlət Universitetinin professoru Cahangir Məmmədliyə, 2-ci dərəcəli Ali Media Mükafatı Elçin Mirzəbəyli (“Xalq Cəbhəsi” qəzeti), Bəhruz Quliyev (“Səs” qəzeti) və Tapdıq Abbasa (“Paralel” qəzeti), 3-cü dərəcəli Ali Media Mükafatı İsaməddin Əhmədov (Zərdabın “Əkinci” qəzeti), Yusif Rzayev ( “525-ci qəzet”), İlqar Rüstəmov (“Xalq qəzeti”), Bəxtiyar Qaraca (“Azərbaycan” qəzeti) və Xalid Niyazova (“Respublika” qəzeti) verilib. ANN.Az