Qusarda ət üsyanı

Qusarda mərkəzi bazarı 3 gündür qaranlığa qərq olub. Bazarın satıcılarının ANS PRESS-ə etdiyi şikayətə görə, bazarda elektrik enerjisinin kəsilməsi onların işinə mənfi təsir edib.Əsas problem isə ət bazarında yaranıb. Qəssabların dediklərinə görə, kəsilən ətlərin hamısı xarab olur. Bu da onlara böyük məbləğdə zərər vurur.Qəssab Rövşən Həbibovun ANS PRESS-in bölgə müxbirinə etdiyi şikayətə görə, bazar rəhbərliyi məsələyə laqeyid münasibət bəsləyir.“Hər ay bizdən 100 manat yerpulu alırlar. Üstəlik bizdən soyuduculara görə də pul alırlar. Amma işıq kəsilib. Heç maraqlanan da yoxdur. Bizə külli miqdarda ziyan dəyib. İndi biizm ziyanı kim ödəyəcək?”, - deyə Rövşən Həbibov bildirib.Məsələ ilə bağlı bazarın müdiri Kəbir Nuriyevin ANS PRESS-in bölgə müxbirinə verdiyi məlumata görə, işıq təkcə ət bazarında deyil, bütünlükdə mərkəzi bazarda kəsilib. Müdirin sözlərinə görə. problem onluq deyil.“Mən hər ay işıqpulunu vaxtında verirəm. Deyirlər qəza olub. Ona görə işıq kəsilib. Mən generator almışam. Bu gündən quraşdıracağıq. Çalışıram ki, problem aradan qalxsın”, - deyə Kəbir Nuriyev bildirib.Problemlə bağlı İcra Hakimiyyətindən də açıqlama gəlib. İcra hakiminin I müavini Şahid Tərəvəzovun ANS PRESS-in bölgə müxbirinə verdiyi məlumata görə, problem transformatorun yanmasından baş verib. “Küçələrə paylanan elektrik enerjisinin tranformatoru yanıb. Məsələ ilə bağlı elektrik şəbəkə ilə əlaqə saxlamışıq. Problemin həll olunacağını deyirlər”.Qusar rayon elektrik şəbəkədən ANS PRESS-in bölgə müxbirinə verilən məlumata görə, hazırda təmir işləri aparılır. Transformator dəyişdiriləcək. Problem bu gün axşama qədər həll olunacaq.ANN.Az